「低調公職王」李宗德

(綜合報道)(星島日報報道)不少長者呻香港人愈來愈冷漠，冇晒以前鄰居守望相助精神。今天，同住一大廈，甚至對面單位，都不再打招呼，人人互相防範。 我點睇呢？建立感情，必須主動表示善意，所以，凡入電梯，見到鄰居，我都會微笑打招呼，久而久之，咪成為朋友囉，大家試試。 小弟現居大廈，非常老牌，四十幾年歷史，我一家一九九二年搬入。可能因在電台、電視曝光率高，故特別易識人，其中一位，住在下兩層，出出入入不時撞見，終於交換卡片。呢位永遠面露寬容先生名李宗德，佢名片印有「和富社會企業」主席，以及「和富塑化集團」行政總裁，兩家機構，都並非高調或經常見報。 終於，約十年前一晚，大家同時間回家，見佢由林鄭月娥（當時仍是署長級）送返嚟，引起我好奇，留下印象，但仍在追查佢背景。 之後，咦，過癮，去到中環寧波商會晚飯，門口又見佢個名，銜頭為會長。好嘞，間中路過職訓局校址，又見大樓由佢捐。繼而，再發現佢名下有小學及護理安老院。間中電視新聞報道慈善大型活動，又見老李一閃而過。 終於，決定全面起佢底。嘩！勁！原來此君擔任公職之多，可以稱王！前後做過香港青年事務委員會主席、公民委員會主席（現任）、香港工業總會副主席、中華出入口商會會長、全國人大代表、香港青年聯合會會長、國際扶輪社地區總監、中華慈善基金始創人、香港傑出青年工業家協會會長、和富大埔足球會會長…… 更勁抽，去年又瞓身搞「無家者世界盃」。 一個如此猛料人物，從不搶風頭在公開場合曝光，只朝朝七點半出門口開始默默耕耘工作及服務。肯定有「A Burning Desire to Serve」，即與生俱來服務燃燒欲念，否則，點會咁呀？ （阿碌開咪 曾智華） 專欄