元旦CY幫襯農戶 唐唐訪中產

【明報專訊】4名特首參選人噚日元旦「各自各精彩」，唐英年孖住太太探訪中產，何俊仁就去老人院探佢92歲嘅姑媽。最大「陣仗」嘅莫過於逛旺角花墟「本地漁農美食嘉年華」嘅梁振英，一家五口「出動」之餘，仲喺嘉年華四圍試食，結果花咗700幾蚊，買咗成袋有機菜同烏頭魚等先離開。

「全力爭取所有選委」支持嘅CY，又點會忽略漁農界嗰60票呢，噚日佢向漁農界「笠高帽」，話本地農產品「有得做」，政府應好好扶助業界。CY喺香港仔漁民婦女會試食蝦乾後大讚「好鮮味」，即時用295蚊買咗蝦乾連埋大地魚粉，仲話想畀仔女拎番英國食。

相比CY「出巡」，去中產屋苑杏花邨探訪兩個家庭嘅唐唐就較「低調」，無安排記者採訪。唐唐事後話聽到中產聲音，明白佢哋希望政府提供供養父母、子女教育同醫療等扣稅優惠。

何俊仁探姑媽 馮檢基去嘉年華

至於選擇去老人院嘅仁哥，就話想表達對長者政策嘅關注。佢話由家人照顧患病姑媽嘅經驗感受到，安老宿位對長者同佢地屋企人都好重要，希望將來可以設立全民退休保障，同將安老院舍輪候時間，由目前嘅3年縮短到18個月。另一參選人馮檢基就為元旦嘉年華做主禮嘉賓，佢話自己參選嘅意向唔會受民望高低左右，否則早前民望偏低嘅唐唐應該一早退出。