恒大逆市增兵5300 搞全球招聘 闢裁員傳聞

【明報專訊】今年年初內地流傳恒大地產（3333）要裁兩成員工嘅消息，即係計起上嚟要裁6000人。恒大當時即刻否認。到咗噚日，恒大突然宣布「逆市加人手」，計劃喺全球增聘5300人，係目前員工人數之上增加16.5%。

恒大話，之前平均每年增聘大概2200人，今年個招聘計劃高過歷史水平不少，範圍由會計去到總工程師甚至去到集團副總裁，都算幾大手筆。內房商今年紛紛調低賣樓目標，投地亦步步為營。恒大自己嘅售樓目標亦只有800億元人民幣，同舊年嘅銷售數字相若，真係唔知點解恒大要請5300人咁多，係要換血，定係逆市擴充，要問恒大管理層才知曉。

調查：四成CFO想請金融專才

小琴醒起，咁啱噚日有個調查採訪咗300個香港公司CFO（首席財務官），其中有八成人表示「對香港今年的經濟增長前景抱有信心」，最不可思議嘅係，仲有超過四成CFO話，因為工作量上升同埋業務擴張，會喺上半年增聘金融、會計及銀行方面嘅人手，只得2%受訪者話會裁員。

小琴見到都幾Surprise。做呢次調查嘅機構Rober Half，香港總裁Pallavi Anand話，就算全球經濟都唔係好掂，香港嘅金融服務業仍然「一片光明」，有好多機會留畀擁有「真才實幹」嘅求職者。

近排仍然不斷聽到外資投行裁員的消息，小琴估計，個報告之所以同好多市場消息嘅風聲有唔同，可能因為啲CFO唔係全部都來自金融行業，又或者想乘低潮請番啲勁人。

email:piano@mingpao.com