【明報專訊】《中大學生報》情色版事件鬧得熱烘烘，昨日更成為立法會前廳的熱門話題，議員及局長圍在一起「細聲講大聲笑」，有人更借題發揮，大談「二級半笑話」。

本身為教育界議員的張文光，亦因而成為圍攻對象。他昨日一踏入立法會前廳，財經事務及庫務局長馬時亨（圖）便即時大叫﹕「張文，立法會選你做中大校董會，你係時候做事啦！教下中大學生哥啦！」

「未來教育部長」投降

張文當然不會示弱，叫肥馬與他一齊開記者會，以正視聽。旁邊的馮檢基更抵死地道﹕「係呀，局長你可以用『未來教統局長』身分，與民主黨友好合作呀！」近日坊間盛傳肥馬會在7月1日新一屆政府轉任教育局長，所以他昨日一聽到阿基講這一句，就即時投晒降，立即坐定定。

不過，一行人就繼續就「情色版學生報」高談闊論，有人提及學生報問卷的其中一題是﹕「你最想與什麼動物做愛？」有議員就話﹕「梗係人啦！」而張文就答﹕「我見到牛，就只會諗起牛扒。」據悉肥馬都答左一個「二級半的答案」，不過班議員就死口拒絕爆料，大家想知道，就要親自問下肥馬啦！