唐唐「N無」惹爆粗疑雲

【明報專訊】煲呔喺周三使出派糖10招，雖然涉及110億元，但其實好多「五無人士」無緣受惠。噚日財委會審批部分撥款建議時，為咗佢哋爆發大戰，多名議員將呢啲漏網之魚形容為「五無」，甚至有人講到係「十無」、「N無」，即係政府派乜佢哋都冇份。政務司長唐英年就開口還擊，話議員而家將「五無」進化成「N無」人士。結果即時激嬲咗之前唔喺議事廳嘅社民連陳偉業，誤會佢講粗口：「『N無』咩意思？係咪粗口嚟？」

原來陳偉業冇聽到其他議員已經將「五無」講到變「N無」，佢仲停留喺「五無」（即無領綜援、無薪俸稅、無差餉、無減租及無電費減免），鬧政府冇幫到呢班人，佢仲燒到話係咪次次要領導人出口指摘，政府先至會被鬧醒。

唐唐火起 指議員太誇張

唐英年聞言即時火起，話議員講得太誇張，將「五無」變成「九無」、「十無」同「N無」，佢決定唔回應，因為唔想重複答案。陳偉業聞言大怒，即時反駁﹕「對我嚟講，好似係粗口！」財委會主席譚耀宗打圓場，說剛才已經有人提過「N無」，司長只係引述，唔係爆粗咁話。其實Emily聽人講咁多年粗口，都未聽過「N無」，唔通陳偉業鄉下有呢句？