田二少新單張曬cool

【明報專訊】立法會九龍西選情一直好激烈，自認選情嚴峻嘅自由黨田北辰將展開新一輪宣傳攻勢，但今次田二少嘅策略係「不談政策，談形象」。Emily收到田二少嘅新單張之後，發現身為時裝集團老闆嘅二少果然有兩度板斧，將宣傳刊物包裝到好似高級時裝廣告，幾頁紙內容中，不再講爭取什麼，不滿什麼，集中標榜二少有「能力、決心、膽色和希望」，感覺幾cool（圖）。

除咗集中包裝自己，田二少前晚喺電視選舉論壇中，以90度鞠躬拜票，佢話，電視時間好寶貴，所以唔想再浪費時間，只講「請支持9號」等陳腔濫調，所以就用身體語言爭取支持。二少仲話，呢個鞠躬係希望選民得到一個信息﹕「我係嚟服務你，希望你畀我一個機會，係民主嘅最高境界。」

同區另一候選人劉千石，一直沒有現身任何論壇，噚日就約記者去採訪佢郵寄單張畀選民。對於早前有調查指佢缺席立法會次數甚高，阿石話自己「不會為講而講」，認為不一定要留喺立法會才是做事。佢又不介意被指今次參選係「食老本」，強調自己過去幾十年為勞工事務打拼，「老本唔容易食」。