文化中心管理員禁記者拍照 康文署：佢哋唔清楚自己講咩

【明報專訊】成日聽到市民話發展商嘅公共空間呢樣唔畀做，嗰樣唔畀做，估唔到連康文署轄下嘅公眾地方都多多限制！噚日Emily去尖沙嘴文化中心對開空地參加環保觸覺記者會，其實大家只係企喺碼頭附近，聽環保觸覺主席譚凱邦發表意見，又無放桌椅無開咪架，點知企咗陣，就有兩個聲稱係文化中心場地管理員嚟阻止，又話唔畀影相，唔畀錄影，有行家忍唔住問﹕「咁點解遊客又可以影相？」

「遊客就得，你哋就要申請！」

兩個管理員竟然話﹕「遊客就得，你哋就要申請！」明明係公眾地方都唔准記者影相訪問？譚凱邦好愕然﹕「吓？呢度都要申請？我哋做10幾分鐘咋喎！」後來有行家喺附近訪問遊客，又殺出一個「文化中心高級廣場主任」話﹕「你咁樣會騷擾啲遊客㗎！ 」記者行十步，佢哋就跟十步，仲上前阻止，連市民都睇唔過眼！

Emily覺得好驚，唔通時代廣場嘅管理員搬晒去文化廣場幫手？最怕係管理員矯枉過正，令市民連公眾地方都用唔到，於是問吓康文署。康文署發言人話管理員可能經驗不足，「遊客影得相？記者唔得？兩者點分呀？我諗佢哋（管理員）連自己講咩都唔清楚」，佢話大家都係怕阻塞通道，影得相，但搞活動就要事先申請，仲向記者道歉