周一嶽睇殘奧變開毒奶粉會

【明報專訊】上個禮拜Emily同大家提過，食物及衛生局長周一嶽鍾情殘奧，所以專登請假睇殘奧閉幕式。局長上京，放假之餘原本打算約見內地一啲對口部門領導social一吓，點知咁啱撞正毒奶粉事件，搞到禮貌式拜訪變成有實務要討論，開會後仲要出嚟見記者，交代會面情况。

梁卓偉履新與公民黨爭見記者

講開食衛局，該局副局長梁卓偉噚日正式履新。首日返工見記者已經成為各副局長的指定動作，Gabriel梁噚日朝早都喺11點半見記者，同大家打招呼。咁啱噚日公民黨4名大狀又去咗政府總部見特首煲呔，又約咗會後見記者，同Gabriel撞到正，在場行家都唔知問邊個先好。Emily身邊嘅食衛局新聞官即刻好緊張咁話，係佢哋預先約好咗，當然係梁副局先答記者問題。最後，當梁副局答問題時，公民黨大狀就唯有企埋一邊等等。