立會新丁迎新 座位「親疏有別」

【明報專訊】喺立法會議事廳內，座位安排從來都係一種學問，噚日雖然只係新丁迎新日，但都足夠體現座位安排上嘅「親疏」。噚日嘅迎新日就好似小學生開學前嘅預備班，畀一班新丁了解吓立法會運作，其中嘅重頭戲包括示範宣誓同埋學習操作電子投票系統。

克勤仔李慧琼超人「霸頭位」

Emily以前讀書時，乖嘅學生通常會「霸頭位」，希望聽得清楚啲，噚日一眾新丁坐喺議事廳內學習，民建聯兩名新丁陳克勤同李慧琼就坐喺頭排位置，旁邊仲有旅遊界「超人」謝偉俊，而一直標榜獨立身分嘅梁美芬就自己坐埋一邊。泛民3名新丁何秀蘭、張國柱同甘乃威亦一齊坐，互相照應。其他「排排坐」嘅組合仲有資訊科技界譚偉豪同會計界陳茂波、工業界（二）林大輝同陳健波，呢兩對組合就顯示佢哋嘅交情。

講番噚日，幸好颱風「黑格比」及時離開香港，否則恐怕迎新日都要延期。不過，喺17名報咗名出席嘅議員中，有6個遲到，包括梁美芬、何秀蘭、張國柱、陳茂波、民主黨黃成智同工聯會潘佩璆，唔知同落風球後，個個逼車返工、交通擠塞有無關係？但點都好，Emily提醒佢哋日後正式開會時，就要預好時間，唔好再遲到啦！

本身準時出席嘅民建聯葉國謙，一見到遲到嘅黃成智，就即刻喺傳媒面前窒人遲到。黃成智解釋，因為要先車太太去醫院睇醫生，所以遲咗5分鐘。講到呢度，阿謙都即時收口。