張學明拿拿淋巡大澳災情

【明報專訊】做立法會議員真係唔簡單，市民投咗票畀你，有咩事就自然會搵你幫手。前日颱風「黑格比」襲港，搞到唔少地方大水浸。身為新界西直選議員嘅民建聯張學明噚日一起身發現大澳水浸，立即遠征大澳了解災情。

張學明先去探訪一間海味店，舖頭前晚水浸，裏面嘅花膠濕晒，全部唔要得，東主損失非常慘重。另一間紙紮舖，由於重陽節快到，東主入咗一批貨，今次水浸亦搞到血本無歸。

張學明唔係通渠專家，唯有盡議員最基本嘅本分，打電話畀食環署，要求派人清理大澳村內嘅垃圾，又聯絡中電，希望盡快替受影響住戶駁好電纜，恢復供電。