長毛贈紙紮MP3 煲呔無黑面

【明報專訊】社民連立法會議員由兩個加到3個，包括聲大夾惡嘅主席黃毓民，特首曾蔭權相信有排煩。噚日煲呔就施政報告會見獨立議員、社民連同民生連線，梁國雄同黃毓民就帶咗兩件相當有創意嘅道具上去見煲呔。

兩件道具包括一個相架同一個紙紮MP3機套裝，長毛話，相架上面寫嘅係「郁得老董，郁得阿曾」，意思唔需要解釋，至於個MP3機套裝，佢話係畀煲呔攞嚟做「助聽器」，等佢聽清楚市民同議員講嘢，煲呔見到真係唔知好嬲定好笑。

噚日成10個議員見煲呔，每人只能講5分鐘，有其他議員話，長毛「阿哥」前、「阿哥」後鬧咗煲呔10分鐘，竟然無人叫停佢，黃毓民又鬧佢5分鐘，煲呔少有地無面黑。

Emily又聽聞，席間獨立議員梁美芬話煲呔如果同政黨傾唔掂，可以搵獨立議員，仲話佢哋都有分量，但煲呔聽完冇特別反應。