臨場刪稿不提京奧 老董國慶晚會致辭

【明報專訊】噚日十．一國慶，Emily聽得最多嘅一定係國歌，其次就係祖國喺過去一年嘅威水史，當然唔少得同胞齊心度過5．12四川大地震、北京成功辦奧運，同埋新鮮熱辣嘅神七成功升空兼首次太空漫步……

場刊登原稿 兩提京奧

威水史唔會有人嫌多，但噚晚喺文藝晚會上，政協副主席董建華竟自我刪減歌頌祖國威水史嘅致辭稿內容。原先Emily都不以為意，但聽落都有啲奇怪，點解整整5分鐘講話中，一句「北京奧運」都無？

事後，Emily睇番大會派發嘅場刊，裏面登咗老董篇講話，原來原稿有兩次提及北京奧運，仲有一次讚香港成功舉辦奧運馬術，不過，最後老董一句都無講出口。點解呢？Emily真係想唔透，就連特首煲呔朝早致辭時都有提及京奧，點解相隔不夠12個鐘頭，老董一句都唔講。箇中原因真係要老董先知。

此外，噚日朝早嘅國慶酒會，有唔少新任立法會議員出席，包括醫學界梁家騮、匯賢智庫葉劉淑儀、獨立梁美芬、工聯會黃國健等。但最搶眼就要數旅遊界「超人」謝偉俊，佢仲帶埋darling白韻琴現身。有資深議員同Emily講，以往嘅酒會，議員多數「單拖」出席，甚少攜眷，可能謝超人想帶起潮流，日後個個議員都帶另一半出席酒會啩！