徐英偉張揚太空人下月訪港

【明報專訊】前陣子惹起全城討論嘅副局長同政治助理事件，可說暫告一段落。噚日國慶，唔少返咗工嘅副局長同政治助理都有喺政府舉辦嘅酒會上「蒲頭」，同政商界人士social一番。

Emily噚日喺酒會上碰見民政事務局政治助理徐英偉，佢好醒目知道傳媒想要乜，於是就「事先張揚」3位神七太空人翟志剛、劉伯明同景海鵬會喺下月齊齊訪港，但詳情仍有待公布。

此外，徐英偉派卡片畀記者時，就大叫各傳媒「輕手啲」，又話自己平日都會同其他政策局嘅政治助理聯絡吓，彼此非常熟落。計Emily話，徐英偉不如搞番個「政治助理人員總工會」，可以有個照應嘛！呢個總工會仲可以爭取權益，但千祈唔好爭取加人工，否則會再招致更大民怨，令人再次諗起有政治助理嘅人工三級跳，舊事重提「3萬變13萬」，咁就唔好啦！