馬拉松式議案辯論 周一嶽「滾水淥腳」

【明報專訊】今年立法會就致謝議案辯論時，例牌要開至少3日會，可謂「馬拉松」式會議，除第一日由朝早11點開始，其餘兩日都要早上9點開始，踩足12個鐘，到晚上9點才暫停。仲有，辯論會分5節進行，主要官員要按每節內容現身議事廳，聽取議員嘅意見。

今次嘅致謝議案辯論只係開咗兩日半，禮拜三開始，噚日下晝4點幾就完結。當時，Emily喺立法會議事廳外碰到多名局長嘅新聞秘書，大呻呢類「馬拉松」式會議好難預時間，唔知幾時講到自己個瓣，局長其他行程都要讓路，或者一改再改，所以呢3日講得最多果句竟然係「Sorry！」

以食物及衛生局長周一嶽為例，原先醫管局噚日朝早請佢出席退修營，兼且預佢發表演辭。點知朝早立法會開始辯論衛生事務環節，最後周局長只好講句Sorry，改到下晝午飯再出席。不過，到咗下晝，周局長雖然有兌現承諾，出席退修營，但都係「滾水淥腳」留咗一陣就要走人，又要趕返立法會，出席投票環節。