53.5％港人 對共產黨冇親切感

【明報專訊】國家領導人同特區政府成日想香港人多啲愛國情懷，要搞國民教育，不過效果似乎麻麻，中大傳播研究中心最近就做咗個民意調查，隨機抽樣訪問咗1014人，發現唔少人對中國公安同埋共產黨感覺唔太親切，反而對解放軍嘅印象仲好啲，唔知係咪因為同四川地震時解放軍嘅英勇救災表現有關呢？

調查顯示，53.5％受訪者對共產黨完全冇親切感，51.2％亦對中國公安無乜親切感覺，反而有42.3％對維多利亞港夜景有好強烈嘅親切感，其次係萬里長城，有35.3％。原來維港夜景喺港人心目中印象仲好過萬里長城、國歌、國旗、人民大會堂以至立法會咁，希望政府睇到呢個調查後，唔會再喺維港填海，唔係到時變咗維多利亞明渠夜景就有啲殺風景啦。