葉太發言面有青光

【明報專訊】平日總會悉心打扮出席立法會會議嘅獨立議員葉劉淑儀，噚日一改風格、著一身黑色套裝，話咁樣同金融界代表李國寶打深色呔襯白色袋巾不謀而合，「今日開會咁嚴肅（討論雷曼事件調查），唔通仲打扮到成隻彩雀咩？」

討論雷曼事件 改穿嚴肅黑套裝

當佢起身發言時，突然有一條光柱直射而來，好似有支大射燈照住葉太，成個舞台劇主角咁，成塊面都發晒青光。

原來唔係立法會幫佢做什麼燈光效果，而係佢嘅座位上面，剛好係圓拱大樓頂嘅窗口，室外陽光照入會議廳，直接射到葉太塊面。Emily提吓葉太，日後發言時要避免中午時段，無謂喺電視直播中發青光啦。