「3L」無得單獨會財爺

【明報專訊】「3L」（林健鋒、梁君彥、梁劉柔芬）自從與自由黨分離後，積極咁同自由黨爭逐中小企嘅「市場」，不過佢哋一日未組黨，喺政府眼中都只係一班獨立議員。好似財政司長曾俊華嚟緊見各黨派議員傾財政預算案，預咗單獨見自由黨3議員，但「3L」就要同其他獨立議員一齊見。

立法會噚日出咗財爺見議員時間表嘅文件，大部分議員都已經夾好時間，除咗少數如社民連、石禮謙、詹培忠等仲未有明確嘅時間。

最近有講法話「3L」好快會同一啲獨立議員如劉皇發、林大輝、陳健波、陳茂波等組成聯盟，林健鋒隨時因為成功組聯盟而有行政會議席位。不過，Emily噚日問林大輝，佢似乎唔太想加入聯盟，佢話組聯盟要好似同一鼻孔出氣咁，但大家都仲係新相識，邊有咁快融洽到可以組聯盟呢？