入境處添裝備助市民

【明報專訊】入境處有一批人員，每當香港巿民喺海外發生事故，就會出發到當地協助，好似2004年南亞海嘯，呢批人員喺災難發生後隨即到泰國布吉同斯里蘭卡科倫坡，聯同其他多隊特區政府人員協助港人，時任公務員事務局長王永平其後更在《公務員通訊》上撰文表揚呢批人員。

不過，有時去到一啲通訊科技落後地方執行任務，往往就好嘥時間，因為有啲地方唔一定有長途電話或者無線電話。不過，入境處最近就添置了衛星電話，即係話，以後去到冇雷公咁遠或者山卡啦咁僻嘅地方，只要帶衛星電話就冇有怕。話時話，入境處仲買了一樣秘密武器，就係電子翻譯機，呢頭輸入英文字句，嗰頭就可以出一句泰文，聽講幾好用。