死者子轟明愛無人性 醫院堅持職員依足指引沒犯錯

【明報專訊】明愛醫院打着「獻出愛心、帶來希望」的宗旨，大開中門救人；但「由朝做到晚」的運輸商楊德祥前日在貨車上贏馬心臟病發，兒子龍仔等即驅車往醫院尋求「希望」，卻換來職員回答謂「唔關我事，你打999」。希望變成了絕望，國際大都會上演了一幕「在醫院門口報警等救護車送院」的悲劇。楊延誤搶救不治後，明愛高層昨日高調回應事件，堅持職員的做法符合醫院指引沒犯錯，「就算我親人在醫院門口心臟病暈低，我都係打999叫白車，醫院門外應該由消防去救」，此語挑起了龍仔的怒火，他不止狠轟院方「無良！無人性！」，還不斷要求院方回答最基本的常識問題﹕「醫院嘅目標係乜嘢？唔係救人咩！」

龍仔透露，與父母一弟一妹五口住李鄭屋邨。前日與56歲的父親楊德祥一起乘坐由「手足」駕駛的3.3噸貨車，在長沙灣潤發倉落貨後，啟程往另一地點，「我阿爸做咗物流好耐，好勤力，由朝做到晚！佢佢佢喺車度好開心講緊馬仔，話贏咗馬，突然無晒聲好似鯁親，哇！我猛咁推佢，『阿爸！應吓我呀，你個仔呀！』我同手足講﹕去明愛（醫院）呀，好近㗎喳！架車仲行緊，我地自己去到門口都唔使兩三分鐘！老竇心臟病發，我用最短嘅時間送佢去醫院門口，手足入去（詢問處）嗌救命，但佢竟然叫我打999！佢電話都無打，當無事發生，咁算點嘛？太過分喇！」

院方：親人門外出事也打999

明愛急症室主管吳奎昨聲稱，就算自己的親人在醫院門口心臟病發，也只會打999等救護車。龍仔聞之大怒﹕「我梗係唔信佢啦！你估我傻㗎咩！佢竟然話喺醫院門口，唔關醫院事！話係消防員嘅責任，識得救人嘅都應該出嚟救呀嘛！嗰個我阿爸嚟㗎！如果我係醫生，我都會即刻搵人落嚟救我阿爸啦……第一時間係做咩？救人呀嘛！我嗌咗救命！你你你叫我點做？打999？玩嘢咩！」龍仔一輪急促大罵，一邊喘氣，一邊深呼吸。

家屬讚拔刀相助醫生

「好多警察問我（剛病發）點解唔喺原地打999？我喺普通地方出事，會好冷靜打999，咁我哋開緊車，佢突然就嚟（病發）！我梗係即刻車去醫院！比起你打999問長問短，時間、地點、人物、電話號碼……仲有邊個快過我？但我打咗999又點？半個鐘都未落到嚟！路過急救個醫生（韋樂申）都發爛渣呀！佢話﹕『點解咁耐都無人嚟呀！』我唔知佢個名，但認得個樣，佢係真正肯幫我阿爸嘅醫生，佢真係好好！」龍仔哽咽，淚如雨下。

「佢（院方）話我行錯路，去唔到急症室。行咩錯路？個度唔係醫院呀？我淨係知道嗰度係醫院！根本成間醫院都有問題，竟然話無醫生喺度。醫院嘅基本目標係乜野，救人呀嘛！叫人打999？如果及時（搶救）我覺得係有（機會救活）㗎！」

「原本我地好平靜㗎！我仲同我阿媽講﹕『千祈咪（跟醫院）鬧交，千祈咪鬧交，唔好勞氣。』但佢（院方）竟然咁樣講，推卸責任！我哋成家人一路睇住電視，一路喺度鬧，太過分！我唔明點解佢地要咁樣講，基本上係廢話！人神共憤！」

「淨係救醫院範圍裏的人？」

「好似唔關佢事，醫院唔係救人㗎！淨係救醫院範圍裏面呀？有人喺門口叫救命呀！叫人去打999，詢問處無電話嘅咩？我好想講，好想表達，好想投訴佢地，真係好無良，我本已經平復咗，我話已經過去咗，接受咗，但係佢講完之後，反而令我覺得呢個做仔嘅，處理方法係有問題累咗阿爸。但係我無錯！」

「尋晚明愛打過電話嚟慰問，唔係我聽，佢都無話係邊個，但今日無派過人上嚟慰問。我係咪應該出鏡，話畀全香港人知？我真係好嬲！我唔想屋企人呢個時候曝光，我要保護佢哋，所以我一定要企出嚟！」

明報記者