生促局補鑊影展頒動畫獎

【明報專訊】港府經常話要支持創意產業，港人陳宇峰（John Chan）與其他成員憑動畫《鏗鏘集之隱蔽老人》，去年底擊敗日本、韓國、馬來西亞、新加坡、台灣、內地等地區嘅參賽者，喺第10屆TBS「DigiCon6 Awards」先後奪得香港區一等獎同「最優秀賞」，吐氣揚眉，但有份宣傳嘅香港生產力促進局就遲遲無喺香港安排頒獎禮，畀網民狂轟。

港人獲日動畫獎「最優秀賞」

生促局噚日就話，落實喺今個月25號嘅「香港國際影視展」裏面加插「2008 DigiCon6大賞 香港區證書頒發典禮」，表揚本港4個入圍嘅創作單位。

得獎者陳宇峰話今個星期收到通知，會同「貓室」製作團隊嘅3個創作人一齊出席，分享箇中喜悅。

得獎者唔評論係咪「補飛」

至於頒獎禮安插咗喺影視展入面，陳宇峰話唔評論局方係咪「補飛」，但佢話今次生力局選擇喺眾多業界參與嘅場合上頒獎畀佢哋，都叫做係鼓勵業界嘅表現，方便佢哋加強交流，實屬好事。