民建聯小幫忙攞足彩

【明報專訊】電盈小股東打贏巨人，成功藉上訴庭判決阻止電盈私有化，說時遲那時快，民建聯噚日已經搵咗一班小股東召開記者會。記者會講民建聯對電盈同私有化法例嘅睇法，點知到尾聲先係重點，電盈小股東大聯盟召集人梁國強同副召集人譚玉娟，代表一班小股東，送咗個膠座畀民建聯李慧琼（Starry），多謝佢一直以嚟嘅幫助，上面寫住「伸張正義」。

Emily心諗，呢下真係攞足彩，唔知幫小股東打官司做中間人嘅社民連「長毛」梁國雄，又有冇呢啲待遇呢？梁國強就否認係做show，強調打完官司之後都有多謝證監會及其代表資深大律師潘松輝。

佢話民建聯一直有支援佢哋，不過Emily問到Starry點幫佢哋時，佢就話Starry工作「不過不失」，民建聯只係充當類似秘書處，幫佢哋發新聞稿，又畀地方佢哋。