李華明收過陰司紙

【明報專訊】梅窩居民強烈反對正生書院搬入，近日成為城中熱話。其實類似嘅事情並唔係第一次發生，好似10年前麗晶花園居民就曾激烈反對興建愛滋病中心；另一個case係麗港城居民反對精神病康復者活動中心，當年民主黨李華明更因為力撐興建，得罪街坊而收過陰司紙，屋企門口更被人噴字辱罵。

屋企被噴「正契弟」字句

Fred當年剛當選立法局議員，要為民請命，佢自己又咁橋住喺麗港城，街坊一心以為佢會企喺自己嗰邊，反對精神病康復者活動中心建於屋苑附近。不過Fred係社工出身，基於社會利益，佢無理由反對復康者設施，因此站在台前力撐興建，之後佢就開始收到滋擾電話，一陣又收到陰司紙，最後連屋企都畀人搞，噴上「李華明正契弟」嘅字句。Fred笑言因為呢單新聞，結果第一次做咗新聞雜誌嘅封面人物喎。