經濟動力「開放日」 8高官到賀

【明報專訊】由退出自由黨嘅立法會議員林健鋒、梁君彥、梁劉柔芬同劉皇發組成嘅經濟動力，噚日舉行「開放日」，出乎Emily意料，政府竟然出動到一個司長加7個局長，包括財政司長曾俊華、發展局長林鄭月娥、保安局長李少光、公務員事務局長俞宗怡等到場。唔知政府會否改為投資落經濟動力度，唔再重視自由黨呢？

酒會雖然喺下午舉行，但有超過80人出席，都算群星拱照。經濟動力都算好大面，政制及內地事務局長林瑞麟人唔到禮到，送咗花籃祝賀。前高官就有馬時亨同葉澍堃等。

經濟動力一向同工商界友好，所以商界猛人長實副主席李澤鉅、政協常委陳永祺、行政會議成員夏佳理、時事評論員李鵬飛都有去。

至於政黨方面，雖然佢哋係退出自由黨另起爐灶，但係舊黨友、自由黨副主席方剛亦都到場，算唔話得。其他政黨方面，民建聯主席譚耀宗、副主席劉江華、黃定光、陳鑑林等都有到場。不過估唔到嘅係，泛民主派中，記者只係見到社民連主席黃毓民到場，其他人就無現身。