盛智文再掌海洋公園3年

【明報專訊】「3年之後又3年……」係電影《無間道》入面梁朝偉不滿上司黃Sir派佢去做卧底嘅經典對白，不過呢句對白似乎都適用喺蘭桂坊主席盛智文（Allan Zeman）身上。點解咁講？因為Allan已經做咗海洋公園主席6年，按慣例就要拜拜，但政府噚日再度委任佢，做多海洋公園主席3年，任期由下月1日起至2012年6月底，打破以往嘅慣例。

當然，已經忙到七彩嘅Allan肯續任主席3年，Emily亦相信佢好享受嘅，因為公園嘅55億翻新工程正正係佢任內提出，家又做得如火如荼，相信佢都想睇埋公園3年之後變完身先功成身退。不過，公園嘅公關就要辛苦啲喇，因為佢哋未來3年，都要幫鍾意扮鬼扮馬嘅Allan諗吓有乜新形象。