龐奴現場﹕名人齊齊開飯否

【明報專訊】Twitter咁流行，就如有Facebook就有中國嘅開心網，有ebay就有淘寶網一樣，自然亦要有大陸版嘅Twitter，即飯否是也。好多著名博客喺飯否開飯，真係更新得好快好勤，實在佩服。好似著名作家連岳，睇佢飯否，真係十幾分鐘就update一次。不過有時名人開飯都惹嚟唔少新聞，因而有時都被認為係炒作。好似之前就有冒陳丹青之名開飯否，事後證明係冒牌貨，但就寫到真嘅一樣。至於艾未未嘅飯否，卻係千真萬確，不過無幾耐又被封殺。於是，有人調侃話﹕艾未未上飯否，唔知係帶旺飯否定累咗飯否，事關以艾未未嘅惹火程度，當然喺飯否開飯會引來眼球傳閱，但一個唔該，太多敏感嘢現身飯否，佢又會否成為另一個牛博？