泛民七一發大財 擺檔籌款反應佳

【明報專訊】七一遊行除咗爭取普選，亦係泛民主派搵錢嘅好時機，好多議員主力唔係遊行，而係嗌咪籌款。金融海嘯下，市民仍然好慷慨，泛民點算過捐款，結果都唔錯，民主黨擺站賣書、T恤等等，賣得30萬元；而公民黨扣除成本後，就有15萬元盈利，都算盤滿鉢滿。

民主黨「營業額」倍增

民主黨總幹事陳家偉同Emily講，營業額有30萬元，多過舊年嘅11萬，當中幾個「黃金點」包括天后同銅鑼灣地鐵站出口、維園糖街入口收穫唔錯，佢哋啲存貨賣得七七八八，T恤已經售罄，書都賣咗好多。不過佢話個黨開支好大，家「年年都係籌款年」。

公民黨總策劃幹事歐陽志飛就話，市民反應幾踴躍，佢哋點算捐款都有15萬元盈利，對個黨營運有幫助，不過之後都要繼續落力籌款。

民協馮檢基前日有去遊行，平時跑開馬拉松、做開健身嘅佢話今年係第一次行到腳抽筋，事關警方截太多次，途中停得太多次。