示威者花槽小解 政府深夜再清場

【明報專訊】社民連立法會議員「長毛」梁國雄同埋港大「示威女」陳巧文等近百名七一遊行示威者，前晚喺遊行結束後死守政府總部，話要同曾特首對話講普選。

封鎖廁所 逼示威者「知難而退」

警方為咗迫使班示威者自行離去，除咗鎖埋政府總部道大閘，等示威者有出冇入之外，仲唔肯開放喺政府總部入面嘅廁所畀示威者使用，結果唔知班示威者係「忍無可忍」，定係要向警方「示威」，有男示威者索性將政府總部門外嘅花槽當作「尿兜」小解。

到咗凌晨4點警方抬走晒所有示威者後，負責政府總部管理嘅行政署官員走過花槽時，就聞到陣陣難擋尿味，於是大喊一句，請工作人員快啲搵條水喉冲一冲個花槽。哈，估唔到警方清場後，政府仲要喺深夜展開第二輪「清場行動」喎。