區議員怕冇人識李小龍 故居復修變紀念館

【明報專訊】李小龍故居嘅業主余彭年，之前話過願意將建築物捐畀政府做紀念館，吸引世界各地嘅「龍迷」參觀，但件事只聞樓梯響，噚日九龍城區議會就開會討論有關復修故居嘅安排。

位於金巴倫道41號嘅李小龍故居，現時係時鐘酒店，業主委託佢嘅測量師朋友陳旭明，負責成個復修概念嘅設計比賽。基本上會上嘅區議員都支持復修，但就關心建築物會唔會擴建，同埋到時咁多人嚟參觀，交通會唔會負荷唔到。旅遊事務助理專員鍾麥雪梅就話，工程會合符城規會及建築物條例嘅要求，又會同運輸署研究道路交通安排。

會上，區議員楊永杰話，好似佢咁嘅年輕一輩，唔係太認識同鍾意李小龍，擔心過多10幾年無人會再去李小龍嘅紀念館，佢仲話﹕「家無人睇『唐山大兄』㗎啦﹗」建議局方多向年輕人介紹李小龍，佢話都未講完，主席王國強就叫佢先番去睇多啲李小龍電影，惹來哄堂大笑。

另外又有區議員擔心，如果紀念館搞到好似Michael Jackson嘅夢幻樂園咁，會令附近嘅街坊不滿。鍾麥雪梅話會以嚴肅嘅態度去辦紀念館，一定唔會搞到好似夢幻樂園咁喎。