林D9買車位收租

【明報專訊】噚日行政會議成員申報利益嘅網頁更新咗，政制及內地事務局長林瑞麟一貫佢做「收租王」嘅風格，上個月同行會申報，佢喺港島又再多一個收租項目。林D9最新喺南區購入一個車位，用嚟收租。

計埋呢個項目，林D9已經有3個項目用嚟收租，其餘兩個都係喺中西區嘅住宅物業，照咁睇嚟，林D9下半世應該都唔使憂，就算退咗休都唔使幫地產商打工啩？

至於行政會議召集人梁振英，唔知係咪要為競選下屆特首「打通經脈」，繼續拓展佢嘅人脈網絡，今年一共出任9個委員會、機構、協會嘅顧問、名譽會長等，包括近排做咗香港防盲協會顧問、香港專業人士協會首席榮譽贊助人、新一代文化協會顧問。

CY後日亦會以行政會議非官守召集人身分，接受香港新界總商會邀請，以名譽團長身分出訪台灣。