推動男女平等 卿姐廣招女黨員

【明報專訊】唔少民主黨人喺20年前爭取88直選時已相識，大家拍住上咁多年，稱兄道弟，所以有白鴿黨人叫自己做「兄弟黨」。但睇嚟遲啲「兄弟」都要改口，事關劉慧卿加入後，已經落咗命令，聯同婦女委員會幾個成員推行「性別觀點主流化」，推行黨內男女平等，遲啲應該有更多女黨員加入。

不滿女將太少

卿姐同Emily講，白鴿黨喺男女平等呢方面唔達標，近700名黨員中，女黨員只得兩成幾，中委30人中只得4名女性。嚟緊黨中央、議員辦事處同地區上都要推行新政策，仲講明要增加女黨員，不過具體方案未定。上禮拜有兩個女新丁加入，卿姐話好開心同歡迎，希望陸續有嚟。

至於卿姐自己個議員辦事處就已經合格，職員5男6女。佢又講笑話，白鴿黨都有啲嘢走得好前，好似幾年前已有「專員」負責處理性騷擾問題，幸好幾年以嚟都無開過齋。

卿姐喺議會提出「性別觀點主流化」好耐，不過政府推行進展好緩慢，例如諮詢委員會現時規定男女委員至少各有25％呢個目標太低，北歐嘅比例係40％。