幕後逾10人「度橋」 幕前亂噏有底線

【明報專訊】《香港亂噏》今晚將播出第8集，集集笑料百出，演員當然並非臨場「爆肚」，節目有10多人負責「度橋」、寫劇本，逢周三、四便會眾首一堂開會「腦震盪」。鏡頭前，有法例、尺度限制，演員不能「亂噏」；鏡頭後，才是笑得人仰馬翻的真正「亂噏」：「哎吔，我哋呢個節目係要低調，收視唔可以高過10點，收視一漲得犀利，就有人管㗎喇！」「不過，中央係管唔到十台㗎！哈哈！」

一人一句「腦震盪」 總找到「笑位」

《香》每周都會討論最新鮮熱辣的民生時事，錄影前幾日便會開會傾內容，會議室內，報紙、雜誌散滿桌上，10多人的製作班底圍着報紙，「吹水」吹到天花龍鳳，當中主導會議的策劃人有3名，分別是亞視製作高級副總裁鄭偉強、亞視綜藝及資訊科監製葉成昌，以及幕前有份參演的林超榮。

他們一人一句，拋出本周新聞重點：「金撈詹」抗議城市論壇離席、馬來西亞咖啡有偉哥、社民三寶大鬧特首答問大會…… 每講一個題目，就算話題嚴肅，討論中必定找到「笑位」，例如快樂指數香港排名84，中國則排20，「唔怪得麻甩佬咁鍾意北上啦！北上原來真係快樂啲！」

不扮米高積遜 怕觸怒樂迷

雖然「亂噏」感覺好像很自由，但總有題目是不會觸及的。受世界注目的MJ逝世，扮不扮米高積遜呢？最終決定不扮，「神鬼我哋唔掂，激嬲Fans咪弊！」不過，友台無綫就不怕得罪，「遲啲開個《大高清帝國》，搵志暈公公向太后賣吓橋都好喎！」