余志穩腰骨確係直 腰患多年 坐唔慣「大班椅」

【明報專訊】社署署長余志穩（Fisher）下星期五就退休，坊間一直懷疑佢未能步步高陞，同佢份人好有「腰骨」，講嘢太直得罪人有關，噚日Emily證實此言非虛，Fisher確係名副其實嘅腰骨直！

下周五退休 自評「有心盡責」

Fisher噚日同傳媒茶敘，透露自己腰骨有問題，唔能夠坐啲舒服嘅「大班椅」，噚日仲帶埋佢坐開嗰4張「又硬又直」嘅櫈畀大家睇。

Fisher話因為腰患，一定要坐啲椅背較直嘅櫈，於是特別搵返政府以前啲舊款直椅背櫈坐。自民政事務局起每次調職，呢4張櫈都要一齊陪佢搬家，就算家社署啲職員入房見佢，都一樣要「坐直條腰」。

曾諗過要圓滑啲唔好「撐到行」

講番退休，臨別秋波，Fisher希望大家對佢嘅評價可以係「官位不高，但做事有心盡責」，佢話自己起初都諗過做人要圓滑啲，唔好成日「撐到行」，後來發現性格難改，到家佢仍認為「啱就要堅持」。

回顧任內工作，Fisher深有體會，佢話如果只係睇file就做政策決定，未必係最好，一定要同當事人傾，做到「望住佢哋對眼解釋都冇有怕」咁話。佢又不忙提醒未來社署署長、現任食衛局副秘書長聶德權要多啲同工會及社福機構見面，又大讚佢係出色政務官、年輕有為。

Emily預祝Fisher退休生活愉快，但就幾擔心佢嗰4張櫈嘅下場，因為又硬又直嘅櫈，唔係個個鍾意坐！