邊個發明做人要醒目?



「做人『醒目』啲,咁就唔使咁辛苦喇。」初出茅廬的時候,有幾多世叔伯苦口婆心地這樣「塞錢入你袋」?所指的「醒目」,自然並非純粹字面解作「聰明、精靈」的意思……真是多得佢地唔少。


「醒目啲」是一段職場符咒,無色無味,卻縈繞不散,深深影響著受詛咒者的仕途、待人接物的態度,以至人生觀,甚至所謂的「命運」,簡直毒過砒霜。

「做人醒目啲」的伎倆不勝枚舉,唯不同的伎倆,同一個願望——終極目標是讀懂老闆眉頭眼額,即「老細翹起條尾就知佢想點」,然後極盡奉承之能事,例如是非不分、不加思索就拋出一句「好好呀!呢個idea真係妙~絕」(小李子腔)之附和言論,僅一句「皇上英明」未說出口。

真正的明君是不會中圈套的,然而回顧古今中外耶穌出世以來的2000幾年歷史,就可以前瞻「小李子」的龐大市場。犯不著有人要站在道德高地,痛斥世風日下。而其實有沒有人看到眼火爆並非重點,反正大家打份工,東家唔打打西家;最無辜的是,有人因而自責少不更事、好揀唔揀而急急轉行,或抱怨時不與我,甚至懷疑自己是不是火星來的,自我萎縮到塵埃裡,平白錯過事業發展機遇。

一個人,無論如何都不可能討好世上所有人。至於誰是英明君主,誰是小李子,誰又是鵪鶉小宮女,很難說得清,亦沒有對號入座的必要性。返工……

- 可以唔擦鞋,但不可以見低就踩
- 可以沒頭沒腦,但防人之心不可無
- 可以返工做點私事(或帶點公事回家處理),但一定要分得清公與私
- 可以無遠見,但一定要有底線
- 可以無深度,但本分要做到
- 可以不求人,但千萬不要得罪人
- 可以不敢苟同,但要明白世事無老奉
- 可以但要走總要飛,但是非地務必遠離

同一句說話,不同的人對不同的人說,會產生不同的化學反應,簡單如一句「真係唔該晒你!」已足夠惹來無限遐想和創作空間。就換個角度去理解「醒目啲」——不做「懶醒」的人,不做「懶醒」的事。

一句講晒︰真正的智慧,是何時何地都能坦蕩蕩對得住天地良心,儘管未能獲得即時回報,亦要相信,終有一天會修成正果,福有「油雞」。灌溉一粒蘋果樹種子,就不相信會種出個桔來。

CTgoodjobs(http://www.ctgoodjobs.hk)