《好聲好戲》陳自瑤表現眼前一亮 網民：絕對可以做埋配音員

無綫綜藝節目《好聲好戲》第一及第二組比賽分別由馮盈盈和張振朗勝出，而第三組嘅參賽藝人就有陳自瑤（YoYo）﹑羅毓儀﹑洪永城和楊潮凱。被稱為「凍齡女神」嘅陳自瑤，有外貌又有演技，估唔到佢連配音都表現出色，連汪明荃（阿姐）早前都話要求公司開劇俾YoYo做女主角。

喺前晚（19日）初登場時，陳自瑤選擇挑戰喜劇，聲演《逐個捉》「夏琳琳」鄭裕玲（Do姐）一角，表現令人眼前一亮。被問到點解選擇聲演呢一幕時，YoYo就話：「因為我咁多年來好少演喜劇，所以我都想挑戰一啲冇演繹過嘅角色，我覺得會突破自己﹑挑戰自己。」主席評判韓馬利都有稱讚佢嘅表現，話佢演繹得好好，不過就有啲緊同過咗少少火，其實都已經好好。

去到噚晚，陳自瑤選擇聲演高難度嘅1981年《流氓皇帝》「媒人婆」鄧碧雲一角，喺表演中YoYo表情生鬼，兼完美捕捉到鄧碧雲嘅石岐話對白、咬字及口形，結果獲得7位評判一致畀綠燈。YoYo完成比賽後話：「其實冇人教我，因為揀呢段片嘅時候，我話其實大碧姐講緊咩，之後佢哋話俾我知係石岐話，會唔會有人可以教到我講石岐話呢，佢哋話應該搵唔到啦。咁我都係死聽大碧姐講，之後就死跟死練咁樣。」首先阿姐就認為YoYo演繹得好神似，陳永信亦大讚YoYo：「3個好，好好好，你又要講石岐話有難度架嘛，同埋佢做到碧姐嗰啲表情，入咗戲，一般配音員都未必配到咁嘅水準，我話嘅。」之後，雷碧娜更用「無懈可擊」去稱讚YoYo，仲話有時佢哋都會自愧不如。

唔少網民睇完佢嘅演出，紛紛留言大讚，例如：「配得好好」、「睇咗咁多集，YoYo 做得最好，真係拍唒手掌，除了她有演戲天份外，相信她一定下了不少功夫」、「巧犀利喎，咁多對白完全對晒嘴型，聲線又似」、「估唔到yoyo咁勁！抵讚，比like like like！加油！」、「Yoyo 絕對可以做埋配音員」、「好鬼死好笑, 正！」、「難度很大但又準確完成，無懈可擊的評價當之無愧！」及「讚 Yoyo好叻叻豬 ，配音行業又一寶藏。」等等。

YoYo今日喺IG發表感受，寫上：「真的很想為這個自己好好記錄一下。入行以來，未試過站在台上參加比賽，這是難得的一次，膽粗粗去挑戰這個陌生的範疇，是希望可以挑戰自己突破自己。雖然真係好驚，驚自己做得唔好，驚自己會出醜，驚自己如果講錯一個字就會前功盡廢，因為站在台上只有一次機會，能做到的只有不停練習，盡力而為。賽果不重要，重要的是希望對得起自己。」唔少網民亦有留言支持及稱讚佢嘅演出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！