《尋人記》勾集體回憶 如果方東昇搵埋呢班人就好喇

由方東昇、黃曉瑩、李曉欣及黃靖婷主持嘅無綫資訊節目《尋人記》廣受好評，節目尋找80、90年代新聞故事嘅主角，例如「大家姐」倩儀、「肥仔」柏熙及「校草」偉約瑟等等，大家可以重溫昔日新聞片段及當時嘅生活環境，同埋會帶大家探尋佢哋而家嘅生活近況。除咗節目受訪嘅昔日話題人物之外，網民都好想方東昇搵返以下呢班人。

阿源
阿源（全名：梁文源）喺2005年《星期日檔案》有一個關於「雙失青年」嘅專題，當時只得22歲嘅阿源接受訪問，並指中學畢業後一直搵唔到全職工作，仲要變成隱閉青年，冇意欲出街。整個訪問中，大家最記得嘅一定係金句「我覺得自己係零」和「這些機會不是屬於我的」，就算去到而家大家都會經常使用呢兩句網絡潮語。去到2013年阿源接受傳媒訪問，當時佢就話將會喺2015年與相識8年、拍拖5個月嘅女朋友Fanny結婚。

阿舜
如果要講《都市閒情》嘅經典表演，相信人都話係2001年由阿舜所演繹嘅《娃娃愛天下》，憑獨特唱功加上精湛嘅甩骨舞獲得關注。之後阿舜就成為失蹤人口，直至2015年先蒲頭，出席電影《猛龍特囧》宣傳活動，期間仲同雨僑合唱《娃娃愛天下》。另外，佢仲改名黃學忠，及喺社交網站開設粉絲專頁，當時成功吸引一班網民追蹤。

凱婷
唔少網民都好想知道「壞過凱婷」嗰個凱婷嘅近況，當年「壞過凱婷」係源自一篇網絡潮文，內容主要係一位初中女學生鬧另一位女學生，不過佢都不算壞學生，因為佢自己同「凱婷」先算係全級最壞嘅學生。

是旦男
真名何家泰嘅是旦男，曾經喺無綫直播新聞中舉起「無綫新聞，事事旦旦」紙牌，引起大家熱烈討論。去到2012年，佢以獨立人身份參選港島區嘅立法會直選，僅得343票。

沈詩鈞
「數學神童」沈詩鈞當年以9歲之齡獲浸會大學破格取錄，成為香港最年輕大學生。喺2011年提早完成學士及碩士課程，2017年完成博士學位，現時喺美國嘅加州大學洛杉磯分校（UCLA）擔任客席助理教授。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！