《愛·回家》「食屎陳師奶」孫慧蓮退休前係訓導主任 連羅家英都係佢學生

無綫處境劇《愛·回家之開心速遞》長做長有，唔少劇中演員更憑角色成功入屋，當中包括飾演「食屎陳師奶」嘅孫慧蓮。近日羅家英及汪明荃分別上載小學聚會嘅合照，而相片中竟然發現「陳師奶」嘅身影，原來已經84歲嘅陳師奶係75歲羅家英嘅老師。

喺劇中嘅「食屎陳師奶」係一個諸事八卦又貪小便宜嘅人，而現實中嘅孫慧蓮斯文有禮，係一個單親媽媽，母兼父職，更做3份工湊大3個女，曾經喺五間唔同嘅官立小學任教長達三十九年，未退休前係一名小學訓導主任，兼任芭蕾舞導師，仲同Ben Sir歐陽偉豪做過同事，一齊處理訓導工作。21歲嘅時候，佢喺觀塘官立小學任教，而當時讀緊5年級嘅羅家英就係佢其中一個學生。

喺1996年，孫慧蓮喺香港電台做兼職，當時見到藝員招聘嘅通告，於是佢就膽粗粗去試鏡，之後就成為兼職特約演員。2006年退休後，佢轉做全職港台特約演員，開始演藝生涯，追尋兒時嘅演員夢。另外，佢仲係一個好有善心嘅人，除咗用積蓄興建學校之外，佢仲經常做義工，例如幫小朋友補習、賣旗及探訪老人院等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！