《最後一屆口罩小姐》首播 網民大讚節目搞笑193轉數快

喺新冠肺炎疫情下，口罩成為大家嘅生活必需品，所以ViuTV就舉辦另類選美真人騷《最後一屆口罩小姐》。節目早前已經宣布口罩小姐40強名單，並公開候選佳麗們嘅相片和資料。去到噚晚，節目終於出街啦！而家就同大家睇下網民有啲咩反應啦！

193冇得輸／有保錡要罷睇

《最後一屆口罩小姐》由ERROR四位成員擔任主持，噚晚ERROR四子一開始先周街搵靚女，然後先返錄影廠甄選出20強。參加者們就要喺佢哋面前進行才藝表演，然後佢哋可以揀選5位參加者進入加入自己嘅組別。喺噚晚，四位主持嘅表現以193最令網民滿意，仲紛紛留言大讚佢，例如：「193 真係不得了」、「193 carry 哂啲節奏」、「笑死33反應好快」、「193轉數快又搞笑」及「佢綜藝加主持能力一流」，而另一主持保錡就得唔到網民歡心，除咗不停望電話之外，佢仲猴擒上台搶人，網民睇完都留言話佢係敗筆，例如「好心幫poki打格仔啦」、「節目敗筆：保錡」、「又話雪佢？點解仲見到佢？」、「保錡扮曬大老」、「有保錡嘅…」及「呢節冇咗poki鏡頭即刻好睇晒」等等。

節目搞笑冇悶場

喺第一集，參加者們需要喺ERROR面前進行才藝表演，而才藝表演嘅項目亦都相當有創意，例如摺紙、拔罐、吹牧童笛、扮嬰兒說話、含住水說話等等。才藝表演除咗令到ERROR睇得好開心之外，一班網民都睇得好投入，仲覺得好搞笑，留言話：「吹牧童笛笑死」、「啲女帶住口罩玩得仲放」、「我笑到停唔到」、「啲參賽者咁有創意嘅」、「真係好過癮」、「佢地同班參賽者好有火花，第一節無悶場」、「呢啲節目先係創意嘛」及「唔怪得tvb 咁驚啦 又幾好睇」等等。

另外，40位參賽者中嚟自各行各業，佢哋嘅主要職業係模特兒、演員、學生和網紅，當中亦有飛機工程師及芭蕾舞導師等專業人士。唔少參賽者喺賽前已經被網民認出，當中包括40號嘅尹蓁晞（Yumi）。Yumi早前就聲稱自己係退選，其實真相係被淘汰。喺噚晚Yumi已經出場，更被ERROR認出，仲話有睇過佢本寫真集。大家唔好以為咁樣係有優勢啊，之後ERROR問佢有關ViuTV嘅事時，佢竟然答唔出ViuTV有咩藝人同劇集，難怪193即場話佢唔專業，最後被淘汰，要除罩離開。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！