《最後一屆口罩小姐選舉》浩南大熱奪冠 齊睇佳麗除罩後網民反應

ViuTV《最後一屆口罩小姐選舉總決賽》喺噚日完滿結束，結果由「浩南」鄭伊琪勇奪冠軍，並同時獲得「服裝與口罩搭配獎」，亞季軍分別由「阿姨」徐蒨寧及「細細粒」馮寶欣奪得，而「除罩最靚獎」就有「三小辣」羅佩芝奪得。喺節目一播出，唔少網民都對佳麗們嘅真面目表示非常好奇，去到噚晚所有佳麗都終於露出「廬山真面目」，網民們對佢哋嘅外貌有彈亦有讚，而家就同大家睇下啦！

冠軍「浩南」鄭伊琪
「浩南」鄭伊琪大熱成為雙料冠軍，原本係一名模特兒，今次仲為比賽減掉11kg。唔少網民都話佢除罩後好靚「浩南好正呀」、「浩南哥幾靚 個樣唔似咁霸氣」、「浩南抵佢拎冠軍」、「靚過港姐！！」、「浩南好甜美呀」及「當浩南除左口罩 就會明白點解佢係冠軍 加上真我個性 抵讚」等等，不過亦有部分網民話佢有東莞小姐feel同埋棚牙唔係太靚。

亞軍「阿姨」徐蒨寧
任職化妝師嘅「阿姨」徐蒨寧，雖然已成人妻同人母，不過依然無阻佢嘅參選嘅決心。喺總決賽時，憑弗爆身材和突出表現獲亞軍。唔少網民都讚「阿姨」好有女人味同有氣質，例如「堅靚, 生完都無肚紋, 身材又好, 完全睇唔出係阿姨!」、「阿姨最正」、「阿姨簡直係我偶像，除左口罩更有氣質，靚太！做左媽媽都可以追求理想架！」、「估唔到阿姨幾靚，好大驚喜」、「呀姨個樣好大方得體」及「超級女人味，好索」等等。

季軍「細細粒」馮寶欣
KOL出身嘅「細細粒」馮寶欣，喺未除罩嗰時已經被巴打們認出，最終冇受身高影響，成功獲得季軍。除罩後，唔少網民都話佢好可愛，紛紛留言話：「其實睇返寶欣係最好嗰個」、「Over all 寶欣最正」、「寶欣 恭喜你 甜美 可愛」、「呢type女仔感覺性格好好」及「好可愛」等等。不過亦有網民話如果佢棚牙白，咁佢會再靚啲。

第四名「肥腰」米露迪
網紅「肥腰」米露迪一直都係大熱人選，網上投票更一直領先，可惜最後大熱倒灶三甲不入。雖然唔少網民一早知米露迪嘅外貌，不過喺除罩後都有唔少網民話佢好似菊梓喬，留言話：「肥腰係hana黎既」、「米=菊梓橋」、「星夢一姐個妹？」及「肥腰同菊梓橋撞樣」等等，大家又覺得佢同Hana似唔似樣呢？

第五名「莎嘩Dee卡」李嘉麗
「莎嘩Dee卡」李嘉麗喺總決賽時大跳鋼管舞，表現令人眼前一亮。最終得到第五名嘅佢，喺取罩後除咗被網民指佢個樣好有泰國嘅味道之外，仲話佢似陳凱琳，留言話「真係好泰國」、「泰國人」、「Sawadee成個陳凱林咁」及「成隻barbie咁 個胸夾到」等等。

第六名「黑妹」黄樂彤
身材高䠷嘅「黑妹」黄樂彤，一直被網民指係最高質佳麗，就算喺總決賽時嘅泳衣環節都非常搶眼。雖然最後只係得到第六名，不過唔少網民都讚佢可愛同夠晒自然，例如：「估唔到原來咁甜」、「性格傻更更，除咗口罩個樣好可愛」、「黑妹係型既」、「真係黑妹最靚」及「好自然大方」等等。另外，亦有唔少網民話佢似唔同嘅藝人，當中包括G.E.M.、姜麗文、雷凱欣、歐倩怡及陳文媛。

第七名「178」張晉雅
走開騎呢路線嘅「178」張晉雅，喺總決賽中繼續以吹牧童笛及著潛水衣，成功突圍而出，獲得網民關注。不過佢喺獲得第七名除去口罩後，唔少網民都對佢樣貌作出批評，留言話「係靚不過好強國feel」、「佢真樣比阿姨仲阿姨」、「酒樓知客樣」及「 好呀嬋」等等。另外，有部份網民話佢個樣有啲似宮雪花、張秀文、裕美同埋何超儀。

第八名「老闆娘」楊慧敏
「老闆娘」楊慧敏（Mina）係馮盈盈嘅大學師姐，得唔少網民歡心嘅Mina，不負眾望獲得第八名。喺取下口罩後，網民們都對佢個樣評價好壞參半，例如「其實樣唔差，但性格扣到負分」、「其實問心, 都幾靚女」、「好老呀佢今日個妝同髮型」、「好似壽星公」及「老闆娘好亞視feel」等等。

相關內容：《最後一屆口罩小姐選舉》冠軍 阿Dee隊成員 - 「浩南」鄭伊琪相集

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！