《美麗戰場》大結局無頭無尾 網民唔收貨

無綫劇集《美麗戰場》今晚（28日）大結局，開播以來無論劇中人物或劇情均成為網民熱話，而在結局最後一幕中，陳瀅突然接到失蹤的前夫方力申的來電，但衝出門口卻發現之前走佬去台灣的異父異母妹妹「反骨琪」蔣家旻竟然以黑色貴婦Look出現，講了句：「好耐冇見，你咁急趕去邊」之後便全劇完，令人摸不着頭腦。

網民對無頭無尾的結局不收貨，紛紛在無綫的社交平台留言怒吼﹕「唔明結局想點」、「爛尾」、「未試過睇到咁嬲」、「反骨琪出現乜嘢意思」、「浪費咗我19集時間」，有網民講笑指劇集應該改名叫《美麗跣場》，甚至湧到導演葉念琛社交平台發洩不滿，直斥結局差，叫他不要再拍劇。

另外，結局中講到黑化的陳瀅壞到底，先後陷害兩位好閨蜜，陳瀅先為錢出賣好友劉佩玥（Moon），欺騙對方自己被方力申家暴，令家暴新聞登上封面而成功要脅方力申給予20億作贍養費，但搞到Moon因假新聞一事被雜誌社開除兼被方力申父親提告，事後陳瀅仍不覺自己有錯，欲以錢解決問題，給Moon一千萬作補償，失望到極的Moon正式跟陳瀅決裂。

其後陳瀅見到陳曉華（Hera）跟張馳豪同行而心生恨意，對Hera昔日的渣男男友、現已淪為乞兒的丁子朗謊稱當日是Hera派人砍其手至殘廢，丁子朗為報仇而殺死Hera，Moon與陳瀅在Hera臨死前趕及見對方最後一面，三人哭成淚人，這場口成為最大的催淚場面。後來Moon得知是陳瀅害死Hera而在醫院大爆發怒摑陳瀅。

原來多位《美》劇演員今晚（28日）飯敍兼一起看大結局，並起哄叫葉念琛拍續集。對於在大結局中尾聲突然出現，蔣家旻接受東網訪問稱：「多謝大家支持！其實個結局係點，我本身係唔知，因為我只係拍咗大家見到最後嗰幾分鐘嘅戲，之後導演點樣去編排、點樣出現，我自己都唔知。我只可以講嘅，就係曾經我錄過一句對白但最後係冇用到。呢個係open ending，導演想將呢個ending交畀觀眾去諗，其實有好多好多可能性，大家可以聯想我返嚟係因咩事、會唔會方力申嘅失蹤係同自己有關。大家都會問好多點解、會唔會有續集，但最後都係要交畀公司，睇係咪開續集。」

而林盛斌接受東網訪問時表示：「好多謝大家咁熱烈討論，我估導演係想有一個opening ending，等大家去討論一下，亦都可能有機會想留一個伏線有下一季，咁我哋作為演員，都係期待嘅，呢啲就交返俾決策者去做決定！不過大結局我見到我同John哥嗰一場講數戲，好多網友都好喜愛，我同阿Moon又有一個溫暖擁抱，頭先我都睇得好窩心嘅！」

導演葉念琛受訪時表示：「自己係一個拍電影出身嘅導演。今次拍電視劇要拍一啲同以前唔同嘅嘢。拍攝時已預咗觀眾會有呢種反應。大家追劇嘅熱烈討論度會令我好有滿足感。我留白ending唔排除開第二季，大家集氣啦。」對於同ViuTV《季前賽》打對台，他表示：「自己收視一直無跌，做到呢樣嘢係成功咗，成套劇入面，好多演員被討論，無綫好耐無試過：「一個人寫劇本、執導同監製，最快拍完、最快播出，只要收視同熱度夠，就唔排除開season two。」