《聲夢傳奇2》爭奪決賽終極五強席位 23學員背景一文睇清

TVB歌唱選秀節目《聲夢傳奇2》喺早前終於選出最後10強，學員們將爭奪決賽最終5個席位，Jasmine及Sabrina喺進行一對一即時淘汰時，已經分別KO咗Sean及Duncan，成功殺入5強，有機會角逐「傳奇新星」殊榮。雖然決賽喺10月2日晚上先進行，不過今屆嘅學員人數比上屆鼎盛，當中唔少學員嘅背景仲相當強勁，而家就同大家睇一睇啦！

XiX隊長劉芷君（Aster）
多才多藝嘅Aster，9歲已經係香港藝術體操港隊運動員。另外，Aster自細開始參加不同種類嘅比賽，至今獲得嘅獎項超過15個，Aster曾經喺比賽時演唱蔡依林《特務J》，片段獲得高度評價。2020年Aster開始喺演藝教育中心進行專業培訓 ，擁有 ABRSM Music Theory 5 級、ABRSM Piano 6 級、ABRSM Singing 6 級、RAD Ballet 8 級實力。Aster雖然喺《聲夢JUNIOR》落敗，不過仍獲機會造成女團XiX，並成為隊長，繼續參加《聲夢傳奇2》。另外，Aster不時喺社交網站上載做體操及拉筋嘅照片，令其擁有無敵海景嘅屋企意外曝光。

XiX成員莊殷玥（Vici）
雖然Vici係上年先開始學唱歌，不過就成功贏得至少12個不同種類嘅比賽嘅奬項，例如《超新星歌唱比賽》「青少年組冠軍」、《真音樂歌唱比賽》「公開組季軍」及《中學大專歌唱比賽》公開組五強等等，Vici更喺《聲夢JUNIOR》獲得第五名，及以女團XiX成員身份參加《聲夢傳奇2》。另外，動靜皆宜嘅Vici亦曾經參加大大小小嘅賽車比賽，成功獲得至少6個獎項。

XiX成員梁善知 （Crystal）
Crystal學唱歌只有一年半時間，不過佢喺2015年開始已經參加唔同嘅比賽，更獲得至少14個獎項。為咗可以增加實戰經驗，Crystal試過喺外國唐人街Busking。佢喺《聲夢JUNIOR》獲得第一名，及以女團XiX成員身份參加《聲夢傳奇2》。

XiX成員繆昀希（Charlotte）
就讀名校嘅Charlotte係參加者中最細，不過佢嘅比賽經驗都非常豐富，除咗街舞之外，佢亦參加唱歌、跳舞及朗誦等比賽，至少獲得18個獎項。Charlotte喺7歲時已經有機會同肥媽合唱《上海灘》，當時表現獲肥媽大讚。另外，Charlotte擁有ABRSM Singing 5 級（Distinction）及 ABRSM Music Theory5 級（Merit）實力。佢喺《聲夢JUNIOR》獲得第三名，及以女團XiX成員身份參加《聲夢傳奇2》。

XiX成員鄧曉殷（Kiele）
美國出世嘅Kiele就讀香港國際學校，擁有ABRSM Piano 5級、RAD Ballet 8級資格及7年大提琴拉奏經驗。喺11歲開始，Kiele參加不同嘅音樂劇演出，並曾獲得超過一年嘅百老匯式歌唱專業訓練。佢喺《聲夢JUNIOR》獲得第四名，及以女團XiX成員身份參加《聲夢傳奇2》。

XiX成員楊秉頤（Caitlin）
有「JUNIOR杜麗莎」之稱嘅Caitlin，自細已經開始拉小提學琴、彈鋼琴及於9歲開始自學結他，曾經係「香港歌劇院」及「香港演藝學院」合唱團學員，擁 ABRSM Singing 8 級、ABRSM Violin 8 級、ABRSM Piano 5 級、ABRSM Music Theory 5 級、RAD Ballet 7 級資格。佢同樣參加不同種類嘅比賽，例如唱歌、小提琴及鋼琴等等，至少獲得20個獎項。另外，Caitlin更係一名游泳健將，多次獲得三甲佳績。佢喺《聲夢JUNIOR》獲得第二名，及以女團XiX成員身份參加《聲夢傳奇2》。

趙紫諾（Sabrina）
趙紫諾因喺國際學校讀書，所以仍然未能講出流利廣東話，不過佢音樂與舞台經驗豐富，精通鋼琴及打鼓，又曾拍超過40個廣告。Sabrina 4歲已學鋼琴，7歲考獲英國皇家鋼琴8級，又獲內地中央電視台《樂童嘉年華》邀請表演鋼琴獨奏，9歲半考獲英國皇家鋼琴頒發專業演奏DipABRSM文憑（演奏級），12歲考獲英國皇家LRSM專業演奏文憑（高級文憑），仲識自己填詞及作曲，小小年紀已經擁有自己嘅作品。佢除咗喺內地、香港及國際多個鋼琴比實榮獲獎項，趙紫諾早於4年前喺美國洛杉磯音樂節表演，又喺11歲時被央視邀請為國慶特別節目《童聲唱》獻唱《雲朵上的夢》，甚至於李雲迪鋼琴演唱會中表演四手聯彈及喺10歲時舉辦鋼琴獨奏音樂會。

任暟晴（Jasmine）
任暟晴嘅音樂根底真係一啲都唔輸蝕，喺3、4歲時已經開始學唱歌，更先後擁有ABRSM歌唱8級及ABRSM鋼琴8級。熱愛音樂嘅佢仲參加過唔少學界或校內歌唱比賽，就連學校嘅IG都有PO佢張相。

彭家賢（Zayden）
彭家賢除咗喺酒廊做過歌手，早於2018年已經以「EXPPA」樂團街頭busking、做過朗豪坊駐場歌手，又係英皇娛樂演藝創意學院歌唱班畢業生。另外，Zayden仲喺2019年參加過ViuTV《全民造星II》，當時演唱小肥嘅《寵物》，可惜被指欠缺個人風格，最終60強止步。

黃洛妍（Janess）
黃洛妍自細已經開始拉小提學琴，仲試過連續8年喺香港校際音樂節嘅小提琴各組別奪得冠軍，連埋其他同類型比賽，佢一共獲得28次冠軍。Janess喺中三時赴奧地利留學及進修音樂，並以15歲之齡考入薩爾斯堡莫扎特音樂大學，並獲得小提琴演奏學士學位，之後再喺維也納普萊納音樂學院修讀小提琴演奏學士學位。佢曾師承已故中國知名小提琴家鄭石生，及有小提琴大師之稱嘅Pierre Amoyal。

趙頌宜（Maggie）
有「翻版蓮姐」之稱嘅趙頌宜（Maggie），自細開始學習唱歌，屬於女低音。佢喺2014年以原名趙綺琪參加內地歌唱比賽《中國好歌聲》廣東省海選並且入圍半決賽。來自藝術世家嘅Maggie，除咗哥哥趙祥誠（折骨Ben）係ViuTV《全民造星3》冠軍之外，姐姐趙綺婷係港大畢業嘅畫家，仲曾經喺2019年參加港姐，可惜無緣打入第二輪面試。

趙小婷（Pamela）
趙小婷自細受爸爸嘅影響，十幾歲已經喺街頭busking，15歲時憑翻唱Dear Jane《愛情三部曲》爆紅，佢亦曾簽約星夢成為旗下歌手。Pamela除咗係唱得之人之外，仲係一名學霸，現時係港大內外全科醫學士。

劉詠彤（Angel）
被視為「黑馬」嘅劉詠彤喺五歲開始學跳舞，仲曾喺「東南亞超級新聲」比賽中奪得「最佳台風獎」。Angel接受8年歌唱訓練及擁有5級爵士鼓資格，佢喺中學畢業後便前往澳洲修讀獸醫護理。

侯雋熙（Duncan）
侯雋熙擁有古典鋼琴演奏級資格、兼自學彈奏流行音樂。畢業於英國Surrey University（薩里大學）音樂系嘅Duncan非常擅長游水及跳Hip Hop，亦非常熱愛唱歌、拉丁舞、社交舞、色士風、瑜伽及所有球類運動，真係動靜皆宜呀！另外，Duncan嘅家境不俗，媽媽係補習社老闆，專門培育幼稚園生入讀名校。

文佐匡（Sean）
文佐匡自細熱愛跳舞，更曾經加入射擊校隊。Sean曾被媽媽送去韓國做練習生，2018年北京電影學院表演班學生，及係韓團EXO前成員黃子韜（Tao）所創立嘅公司旗下藝人。

陳昊廷（Timothy）
陳昊廷自細開始學鋼琴、小提琴、色士風，畢業於名校聖若瑟書院。

蕭呈謙（Nicole）
蕭呈謙喺5歲已經加入香港兒童合唱團，先後學過鋼琴及揚琴，不過未有正式考過任何證書。Nicole同樣比賽經驗豐富，參加過歌唱比賽、粵曲比賽、普通話或英文朗誦比賽等等，而佢嘅志願係成為一個歌手。 另外，柔軟度極高嘅佢，8歲開始學習中國舞，並考獲第11級資格。

金永衡（Christopher）
金永衡係中韓混血兒，除咗擁有五級小提琴資歷，佢仲自學結他、鋼琴及Ukulele。另外，Christopher與其他學員講解不俗，曾邀請佢哋去屋企唱歌，屋企客廳非常寬敞，又多收藏品，被Jason指好似皇宮一樣。金永衡（Christopher）

江廷慧（Vivian）
江廷慧自細學過粵劇，14歲便移居加拿大，畢業後從事攝像師工作。為咗追歌手夢，佢不惜辭工退租返香港，不過佢返香港可以話係一波三折，遇上封關而轉飛上海，喺上海隔離期間確診，不過好彩成功返港參賽。

陳晉軒（Jason）
曾喺英國升學嘅陳晉軒，喺香港同英國學習唱歌7年，並曾參加UK Teenstar Singing Competition 2014”，並代表蘇格蘭參加全國大賽；另外Jason仲參加「2018年沙田區超新聲歌唱比賽」及「2018年18區歌唱比賽」，分別獲得冠軍及季軍。Jason不時喺社交網站上載cover片段，其中《不完美的我》更獲原唱蕭敬騰轉發。

孫衣文（Mandy）
孫衣文曾經喺北京電影學院培訓中心及上海戲劇學院繼續教育學院修讀進修表演、並喺北京現代音樂學院學習唱歌，之後佢仲係TVB第31期藝員訓練班畢業生，並為喺《大玩特玩消暑篇》及《愛回家》等節目演出。另外，佢亦擅長中國舞、羽毛球及有服裝設計相關知識。

梁芷菁（Crystal）
被指外貌與黃美琪有少許相似嘅梁芷菁，自細就好鍾意唱歌，仲獲父母支持暫時休學一年去追夢，而父母亦安排唱歌、跳舞及彈琴訓練，令佢可以提升實力。

李茵彤（Desta）
李茵彤除咗擅長彈結他，佢仲擁有7級鋼琴及5級中樂笛子資格，高中時參加歌唱比賽，而現時就讀幼兒教育。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！