《萬千星輝頒獎典禮2021》周日舉行 重溫陳自瑤疑似黑面／馬國明天然呆好經典

TVB年度盛事《萬千星輝頒獎典禮2021》將於2022年1月2日舉行，日前各大獎項最後五強名單終於出爐，唔知大家嘅心水人選入唔入到最後五強呢？喺今屆視帝視后未誕生之前，不如同大家回顧一下近年《萬千星輝頒獎典禮》嘅經典事件啦！

陳自瑤疑似黑面
《萬千星輝頒獎典禮2020》喺今年初圓滿結束，王浩信憑《踩過界II》成為雙料視帝，講得獎感言時罕有多謝太太陳自瑤（Yoyo），但Yoyo喺鏡頭面前疑似「黑面」及冇作出任何回應，事後引起網民瘋狂討論。

馬國明天然呆
喺《萬千星輝頒獎典禮2012》馬國明憑劇集《On Call 36小時》成為視帝大熱人選，不過最終就由黎耀祥奪得。之後一班藝人走去同黎耀祥祝賀，而馬國明就露出天然呆表情，相當搞笑。

蕭正楠宣佈結婚
蕭正楠及曹永廉憑節目《兄弟大茶飯》奪得《萬千星輝頒獎典禮2018》「最受歡迎電視拍檔」獎項，蕭正楠講得獎感受時，除咗多謝公司之外，佢仲宣佈結婚喜訊：「我好想趁呢個機會，多謝我太太黃翠如」，最後佢哋深情一吻後擁抱。

家燕姐登基
一眾無綫藝人都會悉心打扮出席《萬千星輝頒獎典禮》，當中以薛家燕喺《萬千星輝頒獎典禮2015》嘅黃袍「登基」造型最深入民心。當時王祖藍讀出網民嘅留言，就話網民問佢「今日係唔係登基，點解要著黃袍？」全場藝員即時爆笑。一向玩得嘅家燕姐就回答話：「今日著呢件黃袍係有原因嘅，我今日係做皇太后，嚟到唔使做嘢嘅，係觀禮嘅啫，包括唔使頒獎同攞獎。」

藝員集體吃炸雞
《萬千星輝頒獎典禮2015》喺頒獎中途，安排藝人即場集體食炸雞環節，整個過程大約1分半鐘。事後被批評係植入式廣告，通訊事務管理局指無線嚴重違反守則，判罰款15萬元。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！