《萬千星輝頒獎典禮2022》胡定欣疑似黑面兼唔拍手 向周嘉洛道歉：我真係無黑你面

TVB年度盛事《萬千星輝頒獎典禮2022》喺日前（8日）圓滿舉行，一班網民除咗將焦點放喺得獎藝人及頒獎嘉賓身上之外，亦有網民留意到坐開「一姐位」嘅胡定欣疑似黑面，其後有其他網民搵出幾年前《萬千星輝頒獎典禮》嘅片段，指出佢唔係第一次被人影到疑似黑面。

喺《萬千星輝頒獎典禮2022》中，胡定欣被安排坐喺第一行嘅第一個位，即係「一姐位」。盛裝打扮嘅佢，當晚只係獲得「最佳衣著獎」，喺領獎時佢亦表現得相當興奮和高興。不過喺周嘉洛獲得「最受歡迎電視男角色」時，其他女藝人紛紛為周嘉洛開心及拍手時，胡定欣就被影到態度冷淡，除咗一臉冷漠之外，亦都冇拍手。片段出街後，有網民指佢疑似黑面。之後，有其他網民指胡定欣唔係第一次，之前試過喺《萬千星輝頒獎典禮2018》馮盈盈獲得「飛躍進步女藝員」時，佢亦目無表情咁睇住佢上台領獎。

不過亦有人為胡定欣平反，指佢坐喺度咁多個鐘，一時面無表情係可以理解，再加上喺周嘉洛與陳瀅擁抱時，鏡頭一閃而過之下亦有影到胡定欣有微笑，所以認為佢唔係黑面或對賽果不滿。

去到噚日（10日），胡定欣喺IG上載與好友嘅合照，並恭喜陳山聰榮升視帝。唔少網民及藝人亦有喺帖文下留言，當中包括周嘉洛，而胡定欣就見狀向嘉洛道歉：「周嘉洛，你係度啱啦！我真係無黑你面！~我真心聽緊你講得獎感受！恭喜您！~」，嘉洛亦有回覆話：「多謝你定欣！我會更努力！同埋放心！你總是那麼友善! 就算人地講我都唔信亦唔覺你有黑面。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！