《還珠格格》電影版疑似選角名單曝光 呢位香港演員飾演紫薇？

1998年由趙薇、林心如、蘇有朋、周傑等主演嘅內地經典劇集《還珠格格》紅遍兩岸三地，係唔少網民嘅童年回憶。近年多次傳出要再開拍，直至上年騰訊影業喺發布會上證實將4度翻拍，近日更有疑似選角名單喺網路上瘋傳。

由「小燕子」趙薇擔任監製嘅《還珠格格》電影版，網民最有興趣嘅一定係邊位藝人會擔任男女主角，據傳新版「小燕子」會由《致我們終將逝去的青春》嘅楊子姍飾演；「五阿哥」就由憑《延禧攻略》中飾演富察傅恆而爆紅嘅許凱飾演；「紫薇」將會由近年北上拍劇嘅文詠珊Janice Man飾演；而「爾康」則將由《芸汐傳》飾演秦王嘅張哲瀚飾演。

另外，大家都好期待《還珠格格》原有班底可以重聚，所以除咗「小燕子」趙薇擔任監製之外，飾演「五阿哥」嘅蘇有朋就會身兼導演同升呢飾演乾隆皇、「紫薇」林心如就會特別出演飾演夏雨荷。不過當中最令人意外嘅就係《還珠格格3之天上人間》中飾演知畫嘅「富察皇后」秦嵐都會喺劇中出現，今次將會飾演五阿哥嘅生母「愉妃」。

疑似名單曝光後，唔少網民都質疑名單嘅真實性。因為唔少人認為32歲楊子姍同「小燕子」嘅角色設定唔太相襯，同埋Janice Man根本冇份參演《延禧攻略》，但名單上就寫佢出演過。而瓊瑤兒媳何琇瓊亦表示呢個係假消息。至於新版嘅《還珠格格》目前仲係喺選角中。

不過無論呢個名單係真定假都好，相信唔少網民都會好期待呢個新版《還珠格格》。