【炒晒全部人】外賣平台Plum 年尾裁百人!創辦人:入得Startup預咗啦

蘋果製圖。
蘋果製圖。

因管理不善而一度裁員的外賣平台Plum再傳出「大裁員」,涉及約百員工!有前線員工表示,「之前炒完差唔多50個,同事士氣已經好差,冇諗過咁快又嚟,仲要一次過炒晒,冇錢賠只係得一個月通知期。」她直指,老闆、主要創辦人兼CEO鍾永良管理不善,以致今時今日的局面,「不如直接執咗佢仲好」。Plum承認裁員消息,只會留一至兩名全職員工,聯合創辦人張漢樑表示,「Day 1入得來Startup,都預咗有呢個風險。」

大裁員消息已出,但記者所見,Plum的員工仍於中環開設攤檔派飯。

Plum擁10萬用戶,600間合作餐廳、業務遍全港14個地區,現時全港有近70個取飯點、高峰時每日訂單接近一萬個,更已打開新加坡市場。當時張漢樑接受本報訪問時已曾表示,公司訂單數量本來火箭式上升,至今年8、9月,突然停止增長,迫使公司要重組削支,於9月大手裁員。他當時指,公司早期用人手處理大量工序,又聘請大量推廣人員,本來希望職位自然流失,但公司增長放慢,不得已要主動派大信封。

據了解,成立不足一年的Plum員工數目高峰時超過200人,在初創公司來說十分罕見,九月第一輪裁近50人後,今次裁員更加是一個不留,剩餘的十人之後亦未必「有糧出」,全轉為聯合創辦人 Co-founder,「同事問冇糧出咁點,佢話可以免費畀我哋食飯。」

有前線員工表示,消息傳出後,大家都不知道何去何從,隨後才收到終止合約的電郵,「唔係賠錢即走,仲要做多一個月,依架士氣咁樣你話點做 ?」她又指,公司政策朝令夕改,「上星期美孚晚餐開咗一星期唔夠就閂咗,又閂咗沙田同將軍澳,我都唔知聽日會淨返幾多區。」

張漢樑最新接受本報查詢時,承認公司裁走全部,約百名全職員工,包括其本人。他表示今次裁員目的希望令公司可以繼續營運,現時仍聘用多名兼職,業務可以維持正常,但未來公司會重新審視取餐點數目。對於被裁員工,他表示,「Day 1入得來Startup,都預咗有呢個風險」,不過所有員工可以轉為「聯合創辦人」,但不再有固定月薪,改為「Profit-sharing」。

Plum官方網站列出多家合作餐廳商戶名單,其中一家名單之中的餐廳負責人向本報記者表示,數月前已停止與Plum合作,「我淨係知間公司九唔八搭」,因為「(生意)做得太少」,耗用很多人力和物力,根本賺不到錢。

記者:倪敏慧 黃碧基

對於被裁員工,張漢樑表示,「Day 1入得來Startup,都預咗有呢個風險」,不過所有員工可以轉為「聯合創辦人」,但不再有固定月薪,改為「Profit-sharing」。
對於被裁員工,張漢樑表示,「Day 1入得來Startup,都預咗有呢個風險」,不過所有員工可以轉為「聯合創辦人」,但不再有固定月薪,改為「Profit-sharing」。
有員工指,老闆、主要創辦人兼CEO鍾永良管理不善,以致今時今日的局面,「不如直接執咗佢仲好」。
有員工指,老闆、主要創辦人兼CEO鍾永良管理不善,以致今時今日的局面,「不如直接執咗佢仲好」。
Plum今日於中環仍繼續派飯(夏家朗 攝)
Plum今日於中環仍繼續派飯(夏家朗 攝)