【獨家】細菌感染割左眼保命 冼國林康復後首現身談病情始末

第一信用(8215)原大股東冼國林,佢亦係一代宗師葉問徒孫,冼國林近年涉足娛圈投資拍電影,也成半個娛圈人物。

今年8月,冼國林參加「殼后」朱李月華喺韓國濟州舉行嘅60歲生日會,但突然左眼受到細菌感染,必須切除保命,惡菌甚至蔓延肩頸同脊椎等身體多個器官,情況一度令人擔心。經過3個月閉關治療,冼國林近月逐漸開始重新活躍於社交網,並分享咗身體狀況,依家康復進展良好,佢日前更親身喺大埔接受《蘋果》獨家專訪,首次開腔談及病因。

一身運動裝嘅冼國林,精神抖擻現身。佢訪問時全程戴上太陽鏡,鏡下嘅左眼已割走,蓋上紗布。為咗令身體盡快復元,冼國林堅持每天都到屋苑近海邊單車徑散步兼做運動。冼國林即席興起示範了耍詠春小念頭,甚至做拉筋動作,佢將腳抬高放欄邊做壓腿,雖然冼國林已屆60歲,仲要大病初癒,動作靈巧俐落。

冼國林親口講述病發經過,「事發當日,我哋搭機去濟州出席朱太個生日party,我喺飛機上有少少感冒,去到瞓咗一日冇事,我跟住仲有去宴會,當時個個見我身體狀況仲好好,但突然坐坐吓感覺好寒,開始發燒同痛,病情急轉得好快,我即刻離開返酒店,隻眼開始有啲矇,第二朝就即搭機回港睇醫生。」醫生斷診冼國林左眼受到細菌感染,火速擴散,佢話:「五個醫生會診,有眼科、心臟科、脊椎神經、微細菌同腸胃科。醫生話細菌最弊入咗眼,最弱嘅地方,本來眼球好密。最常見係眼球外起水泡,但呢次細菌入眼球,兩日變膿,係好罕見病例。入院當時幾危險,醫生講我係有生命危險,三日內左眼已全部係膿,左眼已完全睇唔到,醫生話唔切除左眼就會再擴散,情況真係好急,細菌擴散去所有關節,啲菌好惡,發炎指數,普通人15度時,我已去到245度,超標好多倍,每日要打兩種抗生素同類固醇,每次至少兩個鐘。」

細菌同時走咗入頸椎,肩膊疼痛,冼國林話:「醫生話一定要醫,否則細菌侵蝕到頸會鈣化,啲骨一鬆,頸椎冇咗支撐能力,我就會全身癱瘓。」如是者冼國林住院22日,每天都接受抗生素同類固醇嘅藥物注射,當離開醫院返家休養前,醫生為冼國林喺右手前臂植入靜脈導管,直接用藥達心臟,「呢個都好辛苦,做手術將靜脈導管植入手臂,兩呎幾長,每周雖會換敷住嘅紗布,但裏邊好痕,起晒水泡,皮膚敏感,要忍受唔係易頂㗎。」捱咗兩個半月,日前終於可以拆走導管,冼國林仍要繼續抗生素療程,但可改為口服,比較簡單,「醫生都話奇蹟,正常人打11個禮拜抗生素同類固醇,未必頂得順,我仲係打最勁嘅抗生素,托賴冇出現手震、麻痺、食慾不振、瞓唔好同肌肉痠痛嘅副作用,我一樣都冇,可能過往運動底好,我病好又堅持日日練功,肝腎功能都OK。不過o依家只係好咗七、八成,仲未好番晒。我仲要戴咗頸箍兩個幾月,頸椎仲未好番,有啲唔自然,除咗頸箍後有做物理治療。」冼國林身體細菌感染範圍大,所以佢每次檢查照磁力共振,至少都要瞓低兩個半鐘,佢大呻:「瞓喺個窿唔郁得,幾辛苦。」

冼國林受到細菌感染,引致左眼完成喪失視力,待傷口處理妥當,下月初會做裝義眼手術。冼國林依家紗布下嘅左眼情況怎樣?佢形容:「我撕走紗布係一個窿,眼球割空,留番啲皮,割眼係將晶體抽咗出嚟,凹左少少,遲啲塞入義眼,戴平光眼鏡係睇唔出。我初初睇都唔慣,老婆有嚇一跳,但o依家冚住紗布,係唔想關心我嘅人睇咗唔開心。我o依家晚晚拆開紗布洗傷口、滴眼藥水。醫生話進展良好,右眼冇影響到。」至於視力問題,洗國林話:「我視力本身冇問題,直望同正常一樣。冇咗一隻眼,有兩樣嘢唔好,本身視野範圍細咗,左眼旁邊後側位會睇唔清楚,以前係可以睇到180度,o依家大約冇咗15度喇。冇咗立體感,試過夾餸夾唔到,因為距離感差咗,想掟嘢落垃圾桶又掟唔到,但人腦好叻,慢慢會自動調整,o依家開始適應緊。」意志力堅強嘅冼國林話呢次大病,雖失去左眼,卻令佢學會珍惜眼前人,更重視妻女同家庭。

採訪:比華利
攝錄:沈健程、廖達燊

冼國林於今年8月受到細菌感染,左眼三日變成膿,立割走免惡菌擴散。
冼國林於今年8月受到細菌感染,左眼三日變成膿,立割走免惡菌擴散。
冼國林認為失去左眼,但保着性命,算是不中的大幸。
冼國林認為失去左眼,但保着性命,算是不中的大幸。
一直有練功夫的冼國林,慶幸身體底子好去應付呢場大病。
一直有練功夫的冼國林,慶幸身體底子好去應付呢場大病。
冼國林表示大病初癒,試過行五分鐘都腳軟,現在可以做壓腿拉筋。
冼國林表示大病初癒,試過行五分鐘都腳軟,現在可以做壓腿拉筋。
冼國林每天都堅持練詠春。
冼國林每天都堅持練詠春。
冼國林堅強接受治療,經過三個月休養,已好得七七八八。
冼國林堅強接受治療,經過三個月休養,已好得七七八八。
o依家冼國林外出,必有保鑣(左)跟隨。
o依家冼國林外出,必有保鑣(左)跟隨。
今年8月,冼國林喺fb交待身體受到細菌感染要留院。 (資料圖片)
今年8月,冼國林喺fb交待身體受到細菌感染要留院。 (資料圖片)
出院後仍要每天打抗生素同類固醇。(資料圖片)
出院後仍要每天打抗生素同類固醇。(資料圖片)
洗國林係一代宗師葉問徒孫,身手了得。 (資料圖片)
洗國林係一代宗師葉問徒孫,身手了得。 (資料圖片)