【疑行山失蹤】尋妻帖文惹網民熱議 譚先生開腔:唔想逐個去覆 毛巾水樽經搜索隊尋獲

【疑行山失蹤】尋妻帖文惹網民熱議 譚先生開腔:唔想逐個去覆 毛巾水樽經搜索隊尋獲

58歲女子林小儀疑行山失蹤逾兩周,仍未尋獲。繼有山友疑發現林的毛巾一度掛在樹上,其丈夫譚先生昨日在facebook發文稱已找到妻子的水樽,並公開呼籲「有心人」代為照顧妻子。此番言論引起網民熱議,紛指案中疑點重重。譚先生接獲《Yahoo新聞》電話查詢時逐一回應坊間質疑,他指尋回妻子的毛巾及水樽的消息都是從警方及義務搜索隊得悉;他又擔心妻子受傷暈倒,遂希望曾協助太太的熱心人士主動聯絡他,「希望所有網民……有呢個問題我知嘅,但係我都唔想逐個去覆喇,如果細心睇啲字,應該能夠明白我嘅睇法」。

譚先生昨在網上公開呼籲:「祈求如果有『有心人』收留起我太太,請幫我照顧她,等她身體好番之後,請通知我。回家安頓之後,定必重謝。」記者今天下午致電譚先生查詢,譚稱網民「問得太多」,未能逐一回覆。他對記者的提問報以苦笑,多次建議記者向警方失蹤人口組「陳Sir」查詢調查進度。

對於接連尋得太太的毛巾及水樽,譚說:「啲資料係佢(警方)畀我,唔係我自己搵」,強調是經過警方及義務搜索隊搜索所得,「啲資料唔係我自己搵出嚟嘅,係間接佢哋畀我」。他續指毛巾的照片是「義務隊畀我嘅、義務行山人士畀我嘅」。

「佢都出咗街咯,又點會知佢著咩衫?」

至於譚先生發放太太的失蹤照,是以前影下的舊照,「佢都出咗街咯,又點會知佢著咩衫?」譚稱事發後翻查大廈閉路電視片段,發現太太離家的衣著與此舊照相同,遂以此作尋人照。

對於譚先生公開呼籲「有心人」主力聯絡他,他解釋:「我唔知喎,如果你失蹤咗人口,你又搵唔到嘅,你係咪祈求睇吓係咪有個人收留佢呢?」他重申:「呢個淨係一個願望嚟㗎嘛,所以我咪用『祈求』囉,我諗我用字應該都啱嘅」。

「請問我而家呢一刻可以做啲乜嘢呢?」

不少網民對於譚指「等她身體好番之後,請通知我」的說法感到不解,譚答:「你哋細心地睇吓我寫緊啲乜,你睇完之後你會發現呢,個主動權唔喺我度呀。如果我太太真係暈咗、或者係受咗傷、又或者佢失憶嘅,咁又點搵我呢?咁係咪希望佢健康好返先搵到我呢?」他強調「呢個係好邏輯性嘅問題」,重申他的處境非常被動,「請問我而家呢一刻可以做啲乜嘢呢?」

譚先生回應網民質疑

  • 如何回應網民指案件疑點重重?

「希望所有網民……有呢個問題我知嘅,但係我都唔想逐個去覆喇,如果細心睇啲字應該能夠明白我嘅睇法」

  • 帖文提到的「有心人」是否意有所指?

「我唔知喎,如果你失蹤咗人口,你又搵唔到嘅,你係咪祈求睇吓係咪有個人收留佢呢?」

  • 為何在帖文使用「祈求」一詞?

「呢個淨係一個願望嚟㗎嘛,所以我咪用『祈求』囉,我諗我用字應該都啱嘅」

  • 為何在帖文呼籲「等她身體好番之後,請通知我」?

「如果我太太真係暈咗、或者係受咗傷、又或者佢失憶嘅,咁又點搵我呢?咁係咪希望佢健康好返先搵到我呢?」

根據警方資料,林小儀身高約 1.6 米,體重約 50 公斤,瘦身材,尖面型,黃皮膚及蓄短棕髮。她最後露面時身穿紅色長袖上衣、黑色長褲及黃色運動鞋。

警方繼續呼籲,任何人如有該失蹤女子的消息或曾見過她,請致電 3661 3127,或電郵至 rmpu-ntn-1@police.gov.hk 與新界北總區失蹤人口調查組,或與任何一間警署聯絡。