【突發】姜濤出席品牌活動不適暈倒 花姐代報平安︰休息中 沒有大礙

MIRROR成員姜濤今日中午同隊友Anson Lo（盧瀚霆）、Edan（呂爵安）及Jer（柳應廷）喺尖沙咀出席時裝品牌活動，點知喺接受傳媒拍攝期間，姜濤突然腳軟倒下，事後需要由工作人員攙扶離開。

根據現場片段，企喺側邊嘅姜濤影相時已經冇咩表情兼面青青，旁邊嘅Jer可能事先知道情況，所以一路搭住佢膊頭，並提醒姜B鏡頭方向。點知冇幾耐姜B就成個跌低，工作人員一擁上前扶起姜濤，醒目嘅Edan就幫手擋住鏡頭。冇幾耐姜濤就企返起身，但就要由保安人員扶住，離開時腳步浮浮，而且要用手掩口，似係想嘔咁樣。現場嘅fans擔心到尖叫，甚至有人當場痛哭。

品牌活動因此要腰斬，而Anson Lo、Edan同Jer其後再次現身活動場地，向現場嘅鏡粉打招呼及致謝後離開。

姜濤最近要拍攝電影，今日凌晨2點佢仲出post分享拍戲感受，到今朝又要準備出席活動，好有機會係唔夠休息而身體不適。

（1:00更新）

經理人花姐喺IG 交代姜濤情況「今早有少許胃痛 現場環境有點焗 加上閃光燈不斷 所以有少許腳軟而跣低 現在休息中 沒有大礙」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！