【莫名被標籤】同羅天宇細佬傾偈變「車震」 21歲劉穎鏇當場喊爆

主持無綫節目《3日2夜》、有42吋長腿嘅21歲前港姐劉穎鏇（Tiffany），今日成為新聞人物，早前先至同美國嘅男友分手，即被爆火速暗撻前港男、羅天宇嘅24歲細佬胡㻗。報道指佢前晚出席活動後，夜會胡㻗，兩人揸車去僻靜嘅銀線灣路旁密會。

報道指當時Tiffany與胡㻗於車廂中「車震」，摸黑親熱；又指記者上前影，Tiffany個頭突然唔見咗。報道又指兩人即「驅車速逃」，事後記者跟埋Tiffany返家，她拒絕受訪。

今日Tiffany同森美、麥美恩、馮盈盈等錄影《學是學非》，本來已經冷靜落嚟嘅Tiffany，受訪時得悉「車震」一詞意思，即激動得聲淚俱下。

Tiffany稱；「我係噚晚報道出咗之後，有人send俾我睇我先至知。」她稱當晚羅天宇收工，Tiffany又話自己剛食完飯，胡㻗話車埋佢返屋企，於是join埋。

「車震」二字，她說：「呢兩個字我都係啱啱至知點解……我唔明白點解呢個字可以label我哋兩個……雖然我哋兩個係喺架車傾緊偈，但唔明點解可以咁樣label……我會覺得係一件好hurt嘅事。我作為一個女仔，聽到呢件事……我到依家都唔知點解。我唔相信點解件事可以寫到咁。」

至於報道指記者上前影佢時、Tiffany個頭突然「唔見咗」，她解釋：「其實我係未試過咁驚……嗰個moment……本來兩個人喺車傾緊偈，無端端有一個男人行過前面，閃部cam，好光，我好驚。第一，我唔知佢係乜嘢人，惟有縮低。我冇諗過佢係記者，總之我嗰陣只係驚。」

「我冇諗過，呢個動作（縮低）會令大家有咁樣嘅諗法。我哋依家都係好新人嘅人，最重要都係工作為主。」又指雙方依家仲係單身，會否發展仍是未知。問到報道刊出之後無綫有否問話？Tiffany指有向公司解釋。

另羅天宇今日出席另一活動時，也被問到細佬胡㻗同Tiffany車廂密會一時，天宇話：「我有問佢，佢話係朋友，純粹係喺附近收工，Tiffany又咁啱喺附近，咁就送佢返屋企，然後喺附近傾偈。如果佢（胡㻗）拍拖，佢會同我講。」