雅虎香港新聞 【電影LOL】《老友記》25週年特集下周推出 Lady Gaga BTS客串陣容勁到喊
幾經波折，美劇《老友記》25週年特備節目Friends: The Reunion終於定於5月27日HBOMAX播出，預告片暫時得6位主角嘅背脊，都夠令一眾劇迷暴動！
《老友記》於1994年首播，故事圍繞Rachael、Monica、Phoebe、Chandler、Joey同Ross6個人生活點滴與笑料，6個後生仔女生活離唔開愛情、兄妹相愛相殺、事業迷惘及家庭關係，當中最吸引一定係6個人無論發生咩事，10年來互相扶持，不離不棄，絕對係夢寐以求但現實中難求嘅關係。
劇本當年一出大受歡迎，其中Jennifer Aniston 飾演嘅Rachael髮型成為潮流，勁多人跟住剪！播出10年keep住高收視，2004年最後一集大結局超過5000萬觀眾收看，高收視亦吸引到大量巨星客串。
當年未係影后嘅Reese Witherspoon就客串做Rachael嘅妹妹，Julia Roberts就客串過做Chandler返嚟報仇嘅小學同學。Jennifer Aniston前夫Brad Pitt當然有登場，做Ross嘅mean mean舊同學，連影帝Sean Penn都有份，同飾演Phoebe嘅Lisa Kudrow有對手戲！
《老友記》大結局至今17年，不過受喜愛程度雖然歷久不衰。多得串流平台嘅出現，可以翻煲之餘仲成功吸引到新劇迷，2年前Jennifer Aniston喺ig出咗張暗示有機會再次合作嘅6人合照，唔夠24小時已經吸引到700萬個like，認真驚人！
事隔多年再出特備節目不容有失，日前公開嘅客串名人件件巨星級，包括樂壇天后Lady Gaga、小天王Justin Bieber、David Beckham、Reese Witherspoon、名嘴James Corden、南韓天團BTS以及諾貝爾和平獎得主Malala Yousafzai等。
暫時未知以上巨星會以咩形式登場，不過據消息人士透露6位主角將會以演員身份出現喺Friends: The Reunion，帶大家重遊劇集拍攝場地，分享下當年點滴及花絮故事。
觀眾最想知一定係《老友記》6個主人翁20年後過住啲咩生活，Rachael同Ross仲係唔係離離合合？Monica同Chandler呢一對又過成點？Joey同Phoebe2個不按常理出牌嘅，依家又點？話哂重金禮聘先叫得郁6位合體，特備節目會唔會有驚喜？好期待呀！
更多電影文章
【電影LOL】今期睇咩戲 《感動她77次》《太太，請小心輕放劇場版》《屠出殺樂園》《誣罪審判》
【電影LOL】外媒勁眼利 中央台一幅圖睇出 Marvel新片《尚氣》《永恆族》可能被內地封殺
【電影LOL】瘦到背脊見骨！彭于晏減磅拍《熱帶往事》演變態殺人犯
【電影LOL】被指白人主導兼恐同 電視台、影星齊齊杯葛金球獎 湯告魯斯退還獎座
【電影LOL】玉女Lily James演90年代波神 還原荷里活明星性愛片流出事件
【電影LOL】Ironman羅拔唐尼倒戈幫DC開新戲《鹿角男孩》 竟然係暗黑版《小鹿班比》？
【電影LOL】Emily in Paris 第2季全員巴黎準備開工 女主角情歸何處？
【電影LOL】Marvel 晒冷預告片 預視未來5年MCU有咩大片 《永恆族》片段首度曝光
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
