雅虎香港新聞 【電影LOL】傳朴敘俊加入拍新一集《Marvel隊長》演半人半小強Marvel Boy
漫威迷等了又等，漫威電影宇宙終於再次啟動。延期多時嘅《黑寡婦》鐵定7月上映，香港戲院預售仲大送紀念品，而第4階段電影亦陸續有映期！美國疫情緩和，連停擺多時嘅拍攝開始慢慢覆工，有關第4階段漫威電影嘅消息亦越嚟越多！
最新包括新一集《Marvel隊長》（The Marvels）嘅演員陣容，《Marvel隊長》由Brie Larson主演，電影出街後票房及口碑不過不失，可能成績未如預期，所以續集有大動作。原裝片名由Captain Marvel 2改成The Marvels，加入Monica Rambeau（Marvel隊長好友Maria個女）同Ms. Marvel 2個角色做主角，劇情仲會同漫威劇集Wanda Vision crossover，總之主角唔再聚焦喺Marvel隊長一人身上。
不過第4階段籌備已久始終未公佈故事大綱，近日韓媒爆料指《梨泰院Class》男星朴敘俊將會加盟The Marvels，正式進軍荷里活！消息暫時未有官方証實，朴俊敘公司無否認只係回應「無可奉告」，睇嚟消息相當可信，只係時機未到所以唔公開得住！
其實The Marvels導演Nia DaCosta曾經喺自己社交媒體post過朴敘俊係佢嘅韓劇男友，根本係fans！依家有得執導漫威大片，假公濟私或者因利成便，邀請自己男神合作都好正常。朴敘俊客串嘅《上流寄生族》成為奧斯卡大贏家，主演嘅劇集《梨泰院Class》喺Netflix亦大受歡迎，美國、亞洲等地都有知名度，南韓作為全球第5大票倉，cast佢都幾win win。
外媒Screen Rant就率先分析，朴敘俊最有可能飾演Marvel Boy，角色同Marvel隊長一樣係克里人（kree），飛船被歹角Dr. Midas擊落，其父母及女友因此喪命，飛船最後於新澤西州墜落，亦即係The Marvels嘅取景地！Marvel Boy除咗克里星超能力外，仲被加入昆蟲基因，成為可以飛簷走壁嘅「半人半小強」！
另一個可能飾演嘅角色就係「神劍局」S.W.O.R.D探員，「神劍局」喺WandaVision出現過，裡面嘅特工位位地球人無超能力不過對The Marvels嘅故事發展有關鍵作用，
The Marvels預計2022年11月上映，朴敘俊最快都要下半年拍完韓片《水泥烏托邦》先可以出發美國進行拍攝，照時間推算似乎唔夠時間操到勁大隻做好打得嘅Marvel Boy，不過角色有得度身訂做，話唔定有意外驚喜，唯有靜待官方公佈！
更多電影文章
【電影LOL】今期睇咩戲 手捲煙／保鑣救殺手2／狂舞紐約 ／ IS殺錄：摩蘇爾戰線 ／ 高凶任務
【電影LOL】驚慄網劇The Swarm 木村拓哉加盟全英語演出
【電影LOL】《狂舞紐約》談情說愛又講多元文化 演員膚色唔夠多元化捱轟
【電影LOL】政府修訂電檢條例配合國安法 敏感政治片上映有難度
【電影LOL】鄭中基0片酬支持《遺愛》紀錄一宗兇案點影響2代人
【電影LOL】MIRROR ERROR仔仔電視攻上大銀幕 Edan呂爵安拍吳君如鄭中基賀歲片
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
